Kryeministri Edi Rama i ka bërë ‘presion’ BE, duke i kujtuar se Shqipëria dhe Kosova janë një komb i vetëm.
Rama i kujtoi BE-së se nëse nuk hapen negociatat e pranimit të Shqipërisë dhe nëse nuk liberalizohen vizat e Kosovës, dy shtetet nuk kanë ndër mend të mbeten ‘vrima e fundit e kavallit’.
Kreu i qeverisë tha se është i vetëdijshëm, se për këto deklarata Beogradi dhe Brukseli mund të reagojnë. Por, sipas tij Kosova dhe Shqipëria nuk mund të rrinë peng i “historinë së lodhshme të muzikës qoftë në Bruksel qoftë në Beograd”.
Fjala e Ramës
“Serbia duhet të jetë e gatshme të ulet në tavolinë me një fytyrë dhe jo me dy fytyra. Madje me tre në fakt. Një fytyrë për Kosovën, një për Shqipërinë dhe një tjetër për komunitetin ndërkombëtar.
Të zgjedhi cilën fytyrë do përdorë në marrëdhënie me shqiptarët. Ne jemi të gatshëm t’i rrimë përballë me të njëjtën fytyrë që do zgjedhë Serbia.
Dhe e fundit fare, unë ftoj kryeministrin Haradinaj që të bashkohet me mua. Ne kemi nevojën që të kemi një fond për dy Ministritë e Jashtme, të cilat duhet të fillojnë punën me konsulentë ndërkombëtare.
Kjo për të bërë një dokument analitik dhe strategjik, Shqipëri-Kosova dhe rruga e bashkimit të shqiptarëve në horizontin e vitit 2025.
Natyrisht e di se çfarë do të thonë në Beograd apo kudo tjetër. Unë kam para sysh bashkimin e shqiptarëve si domosdoshmëri në rrugën për në BE.
Bashkimi Evropian duhet t’i japë fund qasjes me dy fytyra: Një fytyrë për Shqipërinë dhe një fytyrë për Kosovën. Shqipërisë i thotë do hapim negociatat, Kosovës i thotë do iu liberalizojmë vizat. Dhe ndërkohë ajo që ndodh është që Serbia vazhdon hap kapituj dhe po ia del duke përdorur 3 fytyra. Ndërkohë ne kemi një fytyrë dhe fytyra jonë është kuqezi. Me fytyrën tonë kuqezi ne jemi gati t’i qëndrojmë përballë të gjitha sfidave.
Të gjitha sfidave kuqezi që janë sfida të cilat janë për të rritur ekonominë dhe prosperitetin dhe për të garantuar ardhmërinë e kombit tonë. Ardhmërinë e kombit tonë shqiptar me dy shtete. Dy shtete që i duhet BE, dy shtete që i qëndrojnë të gjitha parimeve. Jemi dy shtete që nuk kemi ndër mend që të mbetemi si brima e fundit e kavallit, në historinë e lodhshme të muzikës qoftë në Bruksel qoftë në Beograd”. /TIRANA TODAY/
