Festat e fundvitit janë ato të cilat sjellin fitime marramendëse për shuma agjensi udhëtimi, pasi joshin qytetarët me të ashtuquajturat “oferta”. Të gjitha kursimet e një viti plot mund e djersë, shkojnë për pak ditë pushimi.
Shumë agjenci arrijnë që të manipulojnë qytetarët me pak euro më pak. Një shumë e papërfillshme me atë se çfarë do të shpenzojnë më pas.
Ata të ofrojnë një paketë. Duke iu referuar edhe kushteve që kanë, qytetarët joshen, duke derdhur deri qindarkën e fundit të buxhetit.
Por jo gjithçka është ashtu siç duket. Shumë prej agjencive, sapo joshin qytetarët, nuk i bëjnë me dije se me çfarë do të përballen në destinacionin përkatës.
Nëse ata duhet të kenë shpenzime ekstra për vendet që vizitojnë, çfarë kosto shtesë mund të ketë një pishinë brenda hotelit, etj.
Por të ekzaltuar nga ofrimi i një mëngjesi (të bollshëm), rrallë herë një darkë, shqiptarët dynden drejt agjencive, duke mos u interesuar paraprakisht se si ata funksionojnë.
Sa vite kanë në treg dhe a kanë qenë të rregullt me klientët e mëhershëm.
Skema
Pak muaj me parë, 6 agjenci janë çuar në Prokurori, për shkak të skemës së mashtrimit. Po si funksionon kjo skemë? Është fare e thjeshtë. Agjencia është e licencuar dhe operon prej kohësh në tregun tonë.
Çdo dokumentacion e ka në rregull. Si për të mos u pikasur, agjensia ka një zyrë të bukur. Po kështu reklamojnë çmime të lira, kjo për të tërhequr gjithnjë e më shumë klientët.
Arsyeja pse reklamonte dhe ofronte këto çmime, lidhet me faktin se nuk bënte asnjë rezervim për klientët e saj dhe jepte bileta fiktive.
Kur kërkesat dhe rezervimet janë të larta, periudha para festave të nëntorit dhe Vitit të Ri, agjencia në fjalë mbyllet dhe zhduket. Në këtë formë ka përvetësuar të gjitha paratë e klientëve të saj.
Qytetarët duhet të ndërgjegjësohen dhe të mos bien pre e manipulatorëve, të cilët ofrojnë paketa me një çmim qesharak, pasi do të ishte e pamundur! Agjencitë të cilat mund të ofrojnë një çmim të ulët, janë vetëm ato të mëdhatë. Të cilat kanë fuqi shitëse dhe mund të marrin nga hotelet apo kompanitë ajrore çmime shumë të mira.
Investimi i të ardhurave tuaja duhet bërë me zgjuarsi, duke zgjedhur agjenci të mëdha, që kanë vite që operojnë në treg. Po kështu kanë një website, sisteme rezervimi, dhe jo thjesht një faqe në Facebook.
