Pas një denoncimi publik të bërë nga qytetari digjital në faqen e Facebook-ut të Berishës, se djali i Luiza Xhuvanit ka dalë nga qelia, lajmi është hedhur poshtë nga Drejtoria e Burgjeve.
Ky insitucion konfirmon se Kostandin Xhuvani ndodhet aktualisht në qelitë e Fushë-Krujës. Mësohet se djali i ish-deputetes e njëkohësisht aktores Luiza Xhuvani, i është nënshtuar një operacioni.
Në datën 05 nëntor 2018, është realizuar ndërhyrja kirurgjikale në QSUT “Nënë Tereza”. Pas përfundimit të operacionit, Konstandin Xhuvani është rikthyer në IVSHB (Spitali i Burgut), për trajtim të mëtejshëm.
Më herët, ish-kryeministri Berisha denoncoi me anë të një statusi, se pas ndërhyrjes, Kostandini kishte lënë ambjentet e bugut, duke iu bashkuar familjes. Por duket se ky ka qënë thjesht një lajm i rremë.
Deklarata e plotë
“Kostandin Gjergj Xhuvani, i datëlindjes 24.06.1989, lindur dhe banues në Tiranë, është dënuar më 35 vjet burgim. Me vendimin Nr.670, datë 10.03.2015, të Gjykatës së Rrethit Gjyqësor Tiranë. Nga dënimi i dhënë, i mbeten për të vuajtur edhe 30 vjet, 7 muaj e 29 ditë burgim, për kryerjen e veprave penale “Vrasje në Rrethana Cilësuese” dhe “Armëmbajtje pa Leje”. Dënim të cilin është duke e vuajtur në seksionin e sigurisë së lartë, në IEV Penale Fushë-Krujë.
Si çdo i dënuar tjetër, edhe të dënuarit Konstandin Xhuvani i garantohen të drejtat e përcaktuara në Ligjin Nr. 8328, datë 14.06.2018, “Për të drejtat dhe trajtimin e të dënuarve me burgim dhe të paraburgosurve” (i ndryshuar).
Thënë kjo, ju bëjmë me dije se në datën 30.10.2018, Kostandin Xhuvani është hospitalizuar ne IVSHB (Spitali i Burgut), për disa probleme shëndetësorë, me diagnozë Nodus hemoroidal. Me kartelë klinike 407.
Në momentin e pranimit në spital, pacienti paraqitej i zbehtë, ankonte për këputje trupore dhe dhimbje rektale. Menjëherë janë realizuar ekzaminimet dhe konsulta mjekësore me mjekun specialist proktolog të “QSUT Nënë Tereza”. Ku ka rezultuar me:
– Anemi(Hb 8mg/dl).
– Prolaps hemoroidal.
Në këto kushte, mjeku specialist ka kërkuar ekzaminimin mjekësor sigmoidoskopi. Në datën 04.11.2018, është realizuar ky ekzaminim dhe konsulta me mjekun specialist, ku është rekomanduar ndërhyrje kirurgjikale.
Në datën 05.11.2018 është realizuar ndërhyrja kirurgjikale në QSUT “Nënë Tereza”. I shoqëruar dhe nën mbikëqyrjen e Forcave Operacionale të Drejtorisë së Përgjithshme të Burgjeve.
Po në këtë datë, pas përfundimit të operacionit, pacienti Konstandin Xhuvani është rikthyer në IVSHB (Spitali i Burgut), për trajtim të mëtejshëm. Sipas rekomandimeve të mjekëve specialistë të QSUT “Nënë Tereza”.
Në ditët në vijim është konsultuar me mjekët specialistë (mjekun hematolog për problemin e anemisë), dhe është trajtuar në IVSHB (Spitali i Burgut) sipas rekomandimeve të tyre.
Aktualisht, ky i dënuar është i hospitalizuar në IVSHB (Spitali i Burgut), dhe me përmirësimin e gjendjes shëndetësore, do të bëhet dalje nga IVSHB (Spitali i Burgut) drejt IEVP Fushë-Krujë”.
https://tiranatoday.com/zbardhet-super-skandali-djali-i-ish-deputetes-luiza-xhuvani-lirohet-nga-burgu/
