Kombëtarja shqiptare prej vitesh kishte pësuar një rritje të konsiderueshme, e cila u kurorëzua edhe me kualifikimin në Euro 2016. Një sukses i jashtëzakonshëm, por që u venit shumë shpejt. Të shtunën në mbrëmje kuqezinjtë e drejtuar nga trajneri italian Christian Panucci është mposhtur me rezultatin e thellë 4-0 në “Loro Boriçi” nga Skocia.
Një humbje që ka tronditur kampin kuqezi, duke rikthyer makthin e viteve të kaluara ku mundej me lehtësi nga ç’do kundërshtar. Fajtor për këtë situatë, më shumë nga të gjithë duket trajneri Christian Panucci. Italiani është praktikisht i ikur.
Vendimi mund të merret që sot, por mund të shtyhet pas ndeshjes kundër Uellsit. Panucci ka një kontratë afro 280 mijë euro në edicion, pra në dy vite. Deri tani ai ka marrë pothuajse gjysmën. Presidenti i FSHF-së, Armand Duka duket se nuk do të presë më Panuccin dhe ka vendosur që shumë shpejt të kemi një trajner të ri në kombëtare.
