Një urdhër i ri i lëshuar nga Ministria e Jashtme greke, po qarkullon në zyrat e departamentit të huaj, ministrinë e Brendshme dhe shërbimet e tjera të lidhura me procedurat e natyralizimit në Greqi. Ky dokument, sipas mediave greke, përfshin disa rregulla të reja për banorët e Shqipërisë Jugore që kërkojnë të marrin nënshtetësinë greke. Në këtë urdhër, pretendohet se shumë shqiptarë etnikë janë duke u prezantuar si banorë të Epirit të Veriut me qëllim që të pajisen me pasaporta greke, që të konvertohen në qytetarë të Bashkimit Europian.
Mediat greke shkruajnë se ka edhe raste flagrante, kur janë kthyer në grekë shqiptarë me qëndrime dhe sjellje anti-helene vetëm me qëllim përfitimin e pasaportës.
Epirotët e Veriut, shkruhet në artikull, para marrjes së shtetësisë greke, në fillim të procedurës kanë përdorur Letrën e Identitetit Homogjen. Kështu, autoritetet nuk u kanë kërkuar atyre të provojnë origjinën e tyre greke, pasi konsiderohej se ky dokument ishte i mjaftueshëm për ta provuar atë.
Sipas këtij urdhri, shqiptarët që kanë marrë nënshtetësi greke, do të ritestohen për të dëshmuar statusin e tyre të përkatësisë etnike, nëse preken nga njëra prej situatave të mëposhtme:
- Për falsifikim të vizës konsullore të lëshuar një personi për të cilin ka prova se nuk është i njëjti me personin e natyralizuar.
- Për çështjen e vizave të sakta konsullore të lëshuara pas vitit 2001, që nuk janë provuar të jenë homogjene.
Ky dokument është lëshuar nga autoritetet më 9 nëntor, pra menjëherë pas vrasjes në Bularat të Gjirokastrës të një minoritari të quajtur Kostandin Kacifas, një ngjarje që rriti tensionet mes Shqipërisë dhe Greqisë./ TIRANA TODAY
