Prokurori në Prokurorinë e Përgjithshme, Sokol Stojani, ka shpjeguar para Komisionit të Vettingut përplasjet me ish-ministrin e Mbrojtjes, Fatmir Mediu. Zanafilla e përplasjes mes palëve nis që në vitin 2009. Stojani ka shpjeguar para KPK se kallëzimi i Mediut ishte pjesë e strategjisë së tij dhe shantazhit për të shpëtuar nga përgjegjësia për dosjen Gërdeci.
Sqarimet e prokurorit reflektohen në vendimin e Komisionit të Pavarur të Kualifikimit. Kjo trupë ka vendosur të konfirmojë në detyrë prokurorin, pasi ka kaluar me sukses të tre testet e Vettingut.
Më datë 24 mars 2009, Fatmir Mediu kallëzoi prokurorin Stojani për “shpërdorim detyre”, në Prokurorinë Pranë Gjykatës së Rrethit Gjyqësor Tiranë. Mediu ka kallëzuar faktin se më datë 19 mars 2009, ai ka qenë i ftuar në emisionin “Opinion”. Sipas tij, prokurori Sokol Stojani ka komunikuar me SMS me gazetarët që kanë qenë pjesë e panelit të emisionit, ku ka qenë i ftuar edhe Mediu.
Në këto komunikime, sipas Mediut, prokurori u ka sugjeruar gazetarëve pyetje publike. Këtë veprim, Mediu e konsideroi si vepër penale “Shpërdorim detyre”. Prokuroria pranë Gjykatës së Rrethit Gjyqësor Tiranë, më datë 21 prill 2009 vendosi “Mosfillimin e procedimit penal nr. (***), datë 27 mars 2009”, pasi fakti nuk parashikohet nga ligji si vepër penale.
Sokol Stojani ka thënë se ky kallëzim ishte pjesë e një strategjie, për të dëmtuar kompaktin dhe kredibilitetin publik të grupit të hetimit.
“Ky kallëzim nuk ishte rrufe në qiell të pastër. Por pjesë e një strategjie për të dëmtuar kompaktin dhe kredibilitetin publik të grupit të hetimit. Nëpërmjet shantazhimit e baltosjes së figurës, apo dhe duke përdorur truke procedurale.
Duke ngritur pretendime, që në fakt nuk mund të konsideroheshin si shkaqe ligjore. Ish-ministri i proceduar penalisht prej nesh synonte të vepronte taktikisht me kërkesa procedurale. Që t’i imponohej Prokurorit të Përgjithshëm, por dhe mua si drejtues i hetimeve ndaj tij për të dhënë dorëheqjen nga çështja. Apo për ta përdorur si shkak ligjor për zëvendësimin tim nga grupi i hetimit dhe mosinformimin e Prokurorit të Përgjithshëm rreth gjendjes së procesit hetimor, me argumentin e konfliktit të interesit”, është shprehur prokurori.
Prokurori Sokol Stojani thotë se ka refuzuar të dorëhiqej nga drejtimi i grupit hetimor për dosjen Gërdeci, ku i pandehur ishte marrë edhe Fatmir Mediu, në cilësinë e ministrit të Mbrojtjes.
“Duke i vlerësuar me seriozitet situatat dhe mjetet e përdorura nga ish-ministri etj. Duke mbajtur parasysh interesat e mbarëvajtjes së hetimit të çështjes, në mënyrë që të mos cenohej uniteti i grupit pas një dorëheqjeje tjetër. Që në thelb do ishte komoditet si për Prokurorin e Përgjithshëm, ashtu dhe për mua personalisht. Morëm përsipër përgjegjësitë dhe natyrisht që dhe unë refuzova dorëheqjen, raporton”Shqiptarja”. “Duke i rrëzuar shkaqet për përjashtim si të pabazuara ligjërisht. Ndërkohë, lidhur me kallëzimin ndaj meje ka vendosur prokurori i çështjes, vendim i cili është tashmë i formës së prerë dhe i pacenueshëm ligjërisht”, ka sqaruar Prokurori.
