Gjyqtari i Gjykatës së Lartë, Edmond Islamaj ka dalë sot para Kolegjit të Posaçëm të Apelimit pas ankimimit të Komisionerit Publik për vendimin e Komisionit të Pavarur të Kualifikimit, që kishte konfirmuar në detyrë këtë gjyqtar në datë 7 Qershor. Në relacionin që Komisioneri Publik i dërgoi Komisionit te Posaçme të Apelimit më 12 Korrik, kur bëri ankimimin për Islamajn, thuhej se verifikimet për gjyqtarin nuk ishin të plota.
Në seancën që po zhvillohet sot në Kolegjin e Posaçëm të Apelimit, Komisioneri Publik ka deklaruar se, ka nevojë për hetim të mëtejshëm lidhur me pasuritë e paluajtshme të gjyqtarit Edmond Islamaj dhe personave të lidhur dhe likuiditetet. Së pari, sipas Komisionerit, duhet hetuar lidhur me një kullotë në Karpen të Kavajës, të deklaruar nga gjyqtari Islamaj.
Së dyti, bashkëshortja e Islamajt ka tre pasuri të paluajtshme nga viti 2001. Këto pasuri, sipas Komisionerit Publik, nuk janë deklaruara askund veç formularit të Vetingut. Tre pronat; apartament, dyqan dhe garazh janë blerë në shumën 1 milion Lekë, e cila, sipas Komisionerit Publik, nuk justifikohet, ndonëse është paraqitur si burim të ardhurash përfitimi financiar i bashkëshortes së gjyqtarit në një organizatë jo fitimprurëse. /abcnews.al
