Kryeministri Edi Rama ka marrë fjalën sot në foltoren e Kuvendit, ku ka komentuar mosdekretimin e Sandër Lleshit si ministër i Brendshëm, nga presidenti Ilir Meta.
Sipas Ramës, Meta nuk ka asnjë të drejtë të refuzojë dekretimin e ministrit të propozuar nga kryeministri. Madje, kreu i Qeverisë kujtoi kohën kur presidenti Nishani dekretoi ministrin e Brendshëm me duar të lidhura nga Kushtetuta, edhe pse e kundërshtoi atë politikisht.
“Kushdo ka të drejtë edhe të hidhet përpjetë, por askush veç popullit sovran nuk e ka as s’e merr dot të drejtën të na pengojë në ushtrimin e mandatit tonë kushtetues. Kjo vlen edhe për presidentin”, tha i prerë Rama, duke iu përgjigjur letrës së presidentit.
Fjala e Ramës:
Shumë nga ne kemi votuar për Ilir Metën si president. Atë ditë nuk e kishim shumicën absolute që kemi sot. Por kisha bindjen e plotë se Meta ishte kandidatura më e përshtatshme në rrethanat kur duhej të zgjidhej presidenti i 7-të. Që kur hyri në Presidencë, pas asaj dalldisjes fatkeqe me flamurin e LSI-së, ai e ka justifikuar thuajse plotësisht votën tonë. Ka respektuar Kushtetutën. Qysh prej të shtunës mbrëma, kemi një problem të krijuar nga presidenti në punën tonë. Puna jonë është të hartojmë dhe miratojmë ligje. Ne kemi detyrën Kushtetuese ta bëjmë këtë punë pavarësisht e kemi ose jo besimin e kujtdo tjetër. Kushdo ka të drejtë edhe të hidhet përpjetë, por askush veç popullit sovran nuk e ka as s’e merr dot të drejtën të na pengojë në ushtrimin e mandatit tonë kushtetues. Kjo vlen edhe për presidentin. Kushtetuta i ka të përcaktuara 8 kompetencat e tij. Paraardhësi i Ilir Metës, pasi e bombardoi ministrin e propozuar prej meje, ai e firmosi dekretin për atë ministër me duart e lidhura nga Kushtetuta e Shqipërisë. Ajo ua ka thënë copë të tërë presidentëve, se s’mund të ushtrojnë asnjë kompetencë tjetër, përveç asaj që nxirren prej saj. Kushtetuta nuk i njeh as me nënkuptim kompetencën për të refuzuar propozimet e kryeministrit.
Meta ka refuzuar kompetencat pa asnjë të drejtë./ TIRANA TODAY
