Ylli i Barcelonës, Lionel Messi ka vlerësuar mundësinë për t’u larguar nga Barcelona në vitin 2017. Bëhet fjalë për një ofertë që Messi ka marrë nga Manchester City, në tetor të 2017-ës.
“El Mundo Deportivo” ka zbuluar detajet e kësaj oferte multimilionë dollareshe. Messi u josh nga as më shumë e as më pak se plot 250 milionë dollarë neto për 5 vite, plus një premio prej 50 milionë euro për babanë e tij si menaxher.
Po ashtu, sipas gazetaës, Manchester City do të paguante klauzolën e lojtarit te Barcelona prej 250 milionë eurosh.
Kontaktet u mbajtën mes drejtorit të Manchester City dhe ish-zëvendës presidentit të Barcelonës, Ferran Soriano, dhe babait të lojtarit, Jorge Messi, të cilit klubi anglez i ofroi një çmim prej 50 milionë euro bruto, në qoftë se do ta bindte djalin e tij për të lënë Barcelonën.
Në total, përfshirë taksat, operacioni marramendës do të ishte 755 milionë euro. Por, duket se kriza politike që shpërtheu në Katalonjë bëri që Messi ta peshonte seriozisht largimin e tij nga katalanasit.
Prandaj, kjo frikë imponoi klubin blaugrana të rinovonte kontratën me yllin argjentinas, me përmirësim të konsiderueshëm financiar, dhe të vendoste një klauzolë astronomike për lirimin e Messit dhe ikjen e tij në një nga katër ligat kryesore europiane (Spanjë, Angli, Gjermani apo Francë).
Në fund, Messi arriti marrëveshjen për të vazhduar me Barcelonën dhe vetëm një muaj pas negociatave me “qytetarët”, në nëntor 2017, rinovoi për katër sezone të tjera, deri në vitin 2021, duke përfituar 35 milionë euro neto në sezon, raporton BW. Klauzola e largimit u bë 700 milionë euro, ndërsa ka edhe opsionin që të rinovojë një sezon tjetër me Barcelonën, me të njëjtat kushte.
