Hapi i madh në karrierë ishte kalimi nga Laçi tek Lokomotiva e Zagrebit, por nuk u mjaftua me kaq. Myrto Uzuni është kthyer në një protagonist absolut në skuadrën e re, ai ka ‘marrë për dore’ skuadrën duke e ndihmuar në çdo ndeshje me gola dhe asiste. Forma e mirë iu shpërblye në mënyrën më të mirë, me një ftesë në kombëtaren kuqezi.
Në ndeshjen e fundit të Kupës të fituar me rezultatin 1-3 ndaj Zadarit në transfertë, 23-vjeçari shënoi golin e radhës. Skuadra e tij fitoi duke vazhduar ecurinë pozitive me 3 fitore radhazi. Mediet kroate kanë bërë një vëzhgim të të gjitha ndeshjeve dhe kanë nxjerrë formacionin më të mirë të raundit të dytë të Kupës. Nuk mund të mungonte në formacionin me rreshtimin 4-2-3-1 dhe beratasi.
“Sërish një përformancë fantastike nga lojtari i kombëtares së Shqipërisë. Në fitoren 3-1 kundër Zadarit, asistoi 2 herë dhe shënoi dhe vetë. Ai është një ‘jackpot’ për klubin e tij. Drejtuesit e Lokomotivës janë të lumtur që e kanë rrëmbyer në duart e tyre. Me 8 ndeshje të luajtura për Lokomotivën ka shënuar 3 gola dhe ka asistuar 6 herë”, – shkruajnë mediet kroate.
