Në Kumanovë të Maqedonisë mbrëmjen e sotme ka ndodhur një përplasje me armë mes dy familjeve shqiptare. Të paktën 5 persona kanë mbetur të plagosur dhe njëri prej tyre raportohet se është në gjendje të rëndë për jetën.
Alsat M raporton se ngjarja ka ndodhur mbrëmjen e sotme në rrugën ‘Tode Mendoll’, ndërsa në konflikt janë përfshirë dy familjet shqiptare Latifi dhe Maksuti.
Mësohet se shtetasit me inicialet F.L. 61 vjeç dhe V.L. 48 vjeç kanë qëlluar me armë në drejtim të V.M., XH.M, R.M dhe M.M, të cilët janë dërguar për mjekim në spital.
Një nga të plagosurit ndodhet në gjendje të rëndë shëndetësore dhe është dërguar në spitalin e Shkupit për trajtim më të specializuar. Nuk dihen ende shkaqet dhe motivet e ngjarje, por forca policie vijojnë hetimet.
