Ish-ministri i Drejtësisë, Ylli Manjani ka reaguar lidhur me dorëheqjen e Xhafajt. Sipas Manjanit, kjo dorëheqje nuk ishte e papritur dhe as nuk ka ardhur nga një sherr mes Xhafajt dhe Ramës. E gjitha, shkruan ish-ministri, ka qenë e llogaritur nga kryeministri Rama i cili po kërkon paqe me opozitën, që kjo e fundit të kthehet në Parlament.
Manjani është po ashtu politikani i parë që ka sulmuar Sandër Lleshin, i cili propozohet të zërë postin e Xhafajt.
“Pa dyshim që njeriu i mirë Sandër Lleshi, polikisht i shërben Edi Ramës si veshja e sheqerosur e pilulave të helmuara”, komenton Manjani.
Më tej, ai shkruan se pas kësaj përpjekjeje të Ramës, është radha e opozitës që të “forcojë radhët e saj dhe të vihet në krye të popullit të çoroditur”.
Reagimi i plotë i Manjanit:
Kujdes.
———-
Pa dyshim që njeriu i mirë Sandër Lleshi, politikisht i shërben Edi Ramës si veshja e sheqerosur e pilulave të helmuara.
Edi Ramës i duhet me çdo kusht një detantë (klimë e ç’tensionuar) politike, për të kthyer opozitën në parlament.
I duhet kjo klimë edhe për të tejkaluar disi në kohë skandalet e pritshme që lidhen tashmë me të.
Arrestimet e të vetëve, telendisja ne publik e të përgjuarve pushtetarë të tij dhe shkarkimi i Fatmir Xhafës janë shenja të qarta që Rama kërkon paqe me opozitën.
Që të mos kemi asnjë iluzion, të gjitha këto veprime ishin të paramenduara nga Rama. Asgjë nuk ka ardhur si sherr i momentit, siç thonë disa media.
Atij i duhet opozita në Parlament sepse nuk i hap më askush derën në perëndim!
Çështja është se nëse Opozita ia ofron këtë paqe e i jep dorën Ramës, praktikisht i jep shkelmin vendit!
Cilido faktor opozitar që e bën këtë gjë do mbahet mend për tradhëti ndaj vendit, demokracisë dhe progresit!
As ndërmjetësimet e huaja nuk e shpëtojnë vendin, nëse do tolerohej shkatërrimi i shtetit, i demokracisë she ekonomisë!
Tani është radha e opozitës të forcojë radhët dhe të vihet në krye të popullit të çoroditur.
