Makina e një biznesmeni në Velipojë është qëlluar me armë. Ngjarja ka ndodhur në fshatin Sektor të njësisë Velipojë. Mësohet se pronari i automjetit është shtetasi Pjerin Kaçi, biznesmen dhe njëkohësisht aktivist i Partisë Demokratike.
Ai ka zbritur nga makina dhe ka qenë duke u ngjitur në një lokal, kur persona ende të paidentifikuar kanë qëlluar në makinën e Kaçit.
Mjeti tip Kyron me targë AA 497 UK është qëlluar në pjesën e përparme me armë zjarri por edhe në pjesën e pasme të tij.
Biznesmeni është futur në lokal, për t’u shpëtuar plumbave, ndërsa autorët e ngjarjes janë larguar me shpejtësi.
Ngjarja ka ndodhur pasditen e 18 tetorit, ndërsa policia nuk ka arritur ende t’i identifikojë autorët. Mësohet se policia e Shkodrës e ka mbajtur të fshehtë këtë ngjarje.
Panorama ka publikuar fotografi të makinës e cila është qëlluar me armë zjarri.
I pyetur nga mediat, Pjerin Kaçi ka deklaruar se nuk e ka idenë përse ka ndodhur.
“Nuk kam konflikte me askënd”, ka thënë ai, duke shtuar se ka dyshime se mund të ketë ardhur për shkak të bizneseve apo edhe si aktivist i njohur në radhët e PD.
