Kryeministri Rama ka folur sot për mbylljen e lojërave të fatit. I ftuar në “Zonë e Lirë”, Rama tha se rreth 700 milionë lekë që i marrin pronarët e lojërave të fatit, tashmë do shkojnë për konsum.
I pyetur nga Çani se si mund të ndodhë kjo, Rama përmendi shembullin e Francës. Po ashtu kryeministri tha se vendimi erdhi pas një studimi të bërë nga Universiteti i Tiranës, ku shifrat janë të frikshme.
Rama tha se kjo industri financohet nga krimi i organizuar që më pas pastron paratë nëpërmjet saj.
Rama:
Së pari kjo është shumë serioze për t’u marrë me shaka. Para sh kohësh bëmë një studim. 68% e lojtarëve që luajnë, e nisin këtë në moshën 10-15 vjeç. Më shumë se 70% e tyre pranojnë që kanë probleme varësie, stresi e nervozizmi gjithmonë e më të rritur. 1 në 4 lojtari i ka shkuar në mendje të vrasë veten. Studimi është kryer në 2016. Në atë kohë porositëm një studim të gjerë për të parë të dhënat në vende të ndryshme. Ajo që ndodh në Shqipëri është e patolerueshme. Kjo është një industri që financohet në masë nga krimi i organizuar dhe pastrohen paratë nga ta.
Mbi 700 milionë lekë hidhen në lumë nga bixhozi, shkojnë për këtë marrëzi. Tani do shkojnë në buxhetin e familjes.
Çani: Ku e di ti?
Rama: Është e provuar në vende të tjera. Franca ka bërë një ndalim radikal para shumë vitesh të salloneve të basteve. Ka kthyer në monopol shtetëror skedinën e futbollit. Ne s’do e bëjmë monopol shtetëror.
