Drejtuesi i televizionit “Zjarr TV”, Ismet Drishti, ka dy fjalë ndaj Ramës në lidhje me vendimin për regjistrinin e 44 portaleve. Ai thotë shkurt dhe qartë se dhuna dhe presioni shtetëror, nuk e ndal atë në misionin e tij.
Drishti nuk është kujdesur për gjuhën e përdorur, e mjaft i revoltuar ai ka shpërthyer në vrer ndaj kryeministrit. Ai i kujton faktin se nuk është pjesë e asnjë kazani, dhe se nuk ka marrë asnjë tender dhe asnjë kokërr leku nga buxheti i shtetit.
Drejtuesi i televizionit “Zjarr TV”, e paralajmëron se askush nuk ka të drejtë që atij t’ia mbyllë gojën. Me krenari për çfarë ka ndërtuar deri më tani, Ismet Drishti e vë në provë Ramën. Në këtë përballje ai e fton që të shkojë në studion e tij, për t’ia thënë nëse është pjesë e ndonjë kazani.
“Një listë e shëmtuar u publikua para dy ditësh nga AKEP, me 44 portale.
Duket që ajo listë nuk ishte hartuar në zyrat e atij institucioni thjeshtë për faktin se në fund të listës ishte edhe Zjarr.tv, që nuk është subjekt i mbikqyrjes së këtij institucioni. Pasi Zjarr Televizion është në varësi direkte nga AMA.
Siç e shikoni në faqen zyrtare të AMA, janë të gjitha të dhënat e kanalit tim televiziv.
Nëse fjala ime i djeg dikujt dhe kërkon të bëjë presion me të tilla metoda, e sqaroj se as dhuna dhe as presioni shtetëror nuk do më thyej dot!
Z. Kryeministër, unë nuk jam pjesë e asnjë kazani. e ky fakt mbase të shqetëson. Unë nuk kam marrë asnjë tender dhe asnjë kokërr leku nga buxheti i shtetit qëkur ky shtet është krijuar dhe e kam ngritur çdo gjë me shpatullat e mia. Duke u ruajtur që të mos bëhem pis në ambjentet e politikës, që janë të qelbura dhe po kutërbojnë deri në Washington!
Z. Kryeministër, ish shoku im i fakultetit, të kujtoj që nuk ka burrë të më mbyllë gojën, pasi unë nuk shpif! Nuk jam si larot që i vinë rrotull selive partiake, për të lëpirë ndonjë kockë!
Nëse humori im te dhëmb ty ose bashkëpunëtorëve të tu, shihni e gjejeni të keqen te vetja!
Unë jam gati të më bëhet Vetting, po ti a je?
Unë kam vetëm një Skënderbe! Ti nuk mund të jesh kurrë Skënderbeu im! Bëhu burrë, eja në studio e ma thuaj në sy që jam pjesë e ndonjë kazani!
Ish shoku yt i fakultetit
I varur veç nga Zoti
Ismet Drishti”.
