Lezhjanët kryesojnë listën për sa i përket shpenzimeve të larta për alkool. Megjithatë, ata mbajnë stafetën edhe për diçka tjetër. Bëhet fjalë për numrin më të lartë të martesave të lidhura për 1000 banorë në 2017-ën.
Sipas INSTAT, norma e martesave në qarkun e Lezhës ishte 10.2 për 1000 banorë. Ndërsa mesatarja në të gjithë vendin ishte 7.7. Përveç Lezhës, qarqe të tjera kanë një numër më të lartë se mesatarja kombëtare për martesat e lidhura. Të tilla janë Berati me 9.2 martesa për 1000 banorë. Apo Dibra me 8.7, Durrësi dhe Fieri me respektivisht 8.3 dhe Elbasani me 8.2.
Qarqet e tjera
Qarqet e tjera ndjekin nga pas me një normë më të ulët se mesatarja. Si Vlora ku gjatë 2017-s u lidhën rreth 7.6 martesa për 1000 banorë, apo Shkodra me 7.4 martesa për 1000 banorë. Kukësi, Gjirokastra dhe Korça kanë pasur një normë prej 7.1 martesash për 1000 banorë gjatë vitit që lamë pas. Rekordin më të ulët për martesat e lidhura gjatë 2017-s e mban kryeqyteti. Ku është përqendruar edhe një pjesë e madhe e popullsisë, ku të ardhurat dhe shanset për të gjetur një punë janë më të larta. Në kryeqytetet sipas të dhënave të Instat u lidhën 6.8 martesa për 1000 banorë, apo rreth 4 martesa më pak se në Lezhë.
Sipas INSTAT martesat kanë hyrë në një trend rënës në vitet e fundit, duke shënuar në 2017-n edhe rekordin më të ulët.
Në vitin 2017 janë regjistruar në zyrat e gjendjen civile rreth 22,5 mijë martesa. Shifër kjo e ulur me 0,4 % krahasuar me një vit më parë, por me një rënie prej 5,7 % krahasuar me vitin 2013. Numri i martesave në vendin tonë ka pasur luhatje. Ajo ka arritur vlerën më të ulët në vitin 2017 me rreth 22,5 mijë martesa, shkruan Monitor. Por edhe pse më rënie, disa prej qyteteve të Shqipërisë nuk e kanë humbur besimin tek institucioni i martesës.
