Ish-ministri i Bujqësisë, Edmond Panariti, ka reaguar me anë të një komenti në Facebook, lidhur me deklaratën e presidentit grek, Prokopis Pavlopoulos.
Presidenti hodhi akuza të rënda ndaj çamëve, duke u shprehur se ata kanë bashkëpunuar me nazistët. Ish-ministri, mjaft i revoltuar nga kjo deklaratë, shprehet se një gjë e tillë nuk mund të jetë kurrsesi e vërtetë, pasi çamët janë populli që kanë vuajtur mijëra persekutime.
Ai thotë se është absurde dhe se nuk mund të akuzosh si bashkëpunëtorë të nazizmit një popullsi të tërë.
Po kështu, Panariti nuk ia lë mangët, teksa i kujton Pavlopoulos, të vërtetën historike siç e quan ai, të ndodhur në fshatin e tij në vitin 1914. 200 burra, 174 gra e fëmijë të pafajshëm u vranë barbarisht, e sipas tij, askush nuk bën përgjegjës popullin grek për këtë.
Më herët, presidenti grek Prokopis Pavlopoulos akuzoi Shqipërinë, se mbështet çështjen çame, për të cilën, sipas tij, duhet të pranojë disa të vërteta historike që ata ishin bashkëpunëtorë të nazizmit.
Ai shtoi edhe më tej dozën e kërcënimeve, duke thënë se nëse Shqipëria dëshiron mbështetjen e Greqisë në rrugën e saj evropiane, atëherë duhet të pranojë të vërtetën historike lidhur me çështjen çame, dhe e vërteta është se Shqipëria mbështet bashkëpunëtorët e nazistëve.
