Një person rreth të 40-tave, pasditen e sotme pasi ka fyer ish-ministrin e Shëndetësisë, Ilir Beqaj, ka qëlluar më tej automjetin e tij. Ilir Beqaj ndodhej me disa pesona, të cilët ishin pranë dy makinave të tyre, një “Volkswagen Touareg” dhe një “Mercedes” me targa diplomatike, kur një i panjohur ka nisur të bërtasë “kriminel, hajdut” dhe fjalë të tjera fyese. Ai nuk e ka lënë me kaq, por ka rrëmbyer një vazo dhe ka qëlluar në fillim “Mercedesin” me targa diplomatike.
Më tej ka vazhduar ta godasë makinën me shkelma, dhe ka rrëmbyer një copë të madhe betoni, duke e hedhur në xhamin e përparmë të makinës së Ilir Beqajt.
Ish-ministri dhe personat që e shoqëronin kanë ruajtur gjakftohtësinë. Ata kanë nxituar të hipin në makina dhe kanë lëvizur 50 metra më tej, raporton “Gazeta Shqiptare”.
Pas këtij akti, autori është larguar me qetësi. Më pas, në vendngjarje ka ardhur edhe Policia e Shtetit.
