Ndërkohe që anëtarët e tjerë të bandës së rrezikshme “Bajri” janë pas hekurave, kreu i këtij grupi, Enver Bajri, i cili konsiderohet si personi më i rrezikshëm, jo vetëm nga Policia shqiptare, por edhe ajo belge, po kërkohet aktualisht në tri shtete. Burimet thanë se përmes bashkëpunimit me partnerët, kërkimet po zhvillohen në Belgjikë, Holandë dhe Luksemburg, ku ka pasur informacione se është parë kohët e fundit ky person.
Hetimet për grupin “Bajri” nisën në prill të këtij viti nga Prokuroria e Krimeve të Rënda, pak kohë pasi Shkodra ishte tronditur nga një shpërthim me lëndë plasëse me objektiv Lul Kullën.
Ndonëse ende nuk ka prova konkrete, ka të dhëna se grupi i të arrestuarve gjatë operacionit “Oaz” mund të ketë kryer edhe atentatin ndaj Kullës. Madje, burime nga organi i akuzës dhe Policia e Shtetit thanë se po hetohen edhe për vrasjen e Fatbardh Licit, i cili u ekzekutua me breshëri kallashnikovi 10 gushtin e këtij viti, raporton Panorama.
I pari Enver Bajri, drejtuesi kryesor grupit, ndërsa personi i dytë dyshohet si një nga personat që përdorej për të vënë gjoba. Burimet thanë se një tjetër personazh kyç në këtë grup është edhe Behar Bajri, i arrestuar në Roterdam, pasi ishte larguar prej më shumë se një jave më parë nga Shqipëria.
Informacioni për të u është përcjellë autoriteteve të huaja dhe në bashkëpunim me partnerët përfundoi në pranga. “Është provuar në javët e fundit se anëtarët e këtij grupi kriminal kanë kanosur dhe shtrënguar disa shtetas për dhënie shumash të konsiderueshme parash. Ky grup është i dyshuar dhe po hetohet intensivisht për disa nga ngjarjet e fundit të ndodhura në Shkodër”, theksoi Ardi Veliu gjatë konferencës për shtyp.
Sipas burimeve, gjobat e vendosura kohët e fundit, fillimisht u njoftoheshin të dëmtuarve nga Behar Bajri. “Behari jam”, u thoshte në telefon i dyshuari dhe më pas viheshin në lëvizje të tjerët, të cilët, siç rezulton nga përgjimet e shumta, i vendosnin afat të dëmtuarve në disa raste edhe me frazën: “…e mira është mos ta vonosh porosinë”.
