Një çmenduri! Kështu është quajtur ajo që ndodhi dje në ndeshjen e Interit në San Siro. Zikaltërit arritën që të përmbysin një rezultat 0-1 vetëm në minutat e fundit me një gol shumë të bukur të Icardit dhe më pas me një gol të Matias Vecino në minutën e 92, kur gjithçka dukej se po përfundonte në barazim.
Interi e nisi mirë lojën dhe luajti mirë në përgjithësi në pjesën e parë, por një devijim i pafat i Mirandës në pjesën e dytë bëri që zikaltërit të kalonin në disavantazh pasi Handanovic nuk arriti ta kapte topin në kohë.
Pas disa minutash vuajtje, Interi arriti të nxirrte një gol pas një krosi të Asamoah të cilin Icardi e shndërroi në gol fluturimthi. Një nga golat më të bukur të javës e që do të mbahet mend në këtë Champions jo vetëm nga tifozët e Interit. Por le të ndalemi pak të gjithë tek goli i Matias Vecino që i dha Interit tre pikët.
Të gjithë duhet ta mbajnë mend komentimin e çmendur të komentatorit Italian të Sky Sport, Trevisani, në atë Inter-Lazio të fituar në minutat e fundit gjithashtu me një gol të Matias Vecino në ndeshjen e fundit të Serie A vjet.
Duket se e gjithë ajo vepër është vënë përsëri në jetë nga të njëjtët aktorë: Vecino që shënon dhe Trevisani që çmendet pas mikrofonave sëbashku me Lele Adanin. Por në të tilla raste, fjalët janë të tepërta. Le ta shijojmë edhe njëherë videon me 4 minutat e fundit të ndeshjes:
