Të enjten, PD e LSI do të bojkotojnë punimet e Kuvendit. Grupet parlamentare të opozitës nuk do të shkojnë në Kuvend gjatë seancës plenare as këtë të enjte. Opozita më herët kishte njoftuar që do të kishte një marrëdhënie të kushtëzuar me Kuvendin, dhe bën me dije se do ta bojkotojë edhe këtë javë seancën plenare.
Burimet bëjnë me dije se deputetët nuk do të jenë të pranishëm në Kuvend, por do të shkojnë në qytetin e Vlorës.
Ky do të jetë takimi i katërt i opozitës në qytetet e vendit. Fillimisht u mblodh në Shkodër, më pas në Elbasan, e javën e kaluar në Durrës.
Opozita e bashkuar ka bojkotuar seancat plenare të këtij sesioni të ri parlamentar. Më 3 shtator, opozita bojkotoi Kuvendin, duke u zhvendosur në Shkodër, për të vijuar më pas në Elbasan e Durrës.
Ndërkohë që qeveria Rama e ka quajtur këtë lëvizje të opozitës, si një shmangie nga detyrimet kushtetuese që deputetët e opozitës po bëjnë.
