Mesfushori i Arsenalit, Mesut Ozil, ka pranuar se kurrë nuk ka parë një njeri si Cristiano Ronaldo i cili e ka ndihmuar shumë të përmirësohet si lojtarë gjatë kohës që luanin tek Real Madrid. Gjatë tre viteve që kaluan bashkë në “Santiago Bernabeu” ata arritën të fitojnë titullin e La Ligës dhe Copa del Rey. Ozili vazhdimisht asistonte për Ronaldon, i cili njihet si një ndër golashënuesit më të mirë.
Ozil gatë verës së vitit 2013 u transferua te Arsenal, ku luan akoma tani. Ndërsa nga Madridi tashmë është larguar edhe Ronaldo, pas 9 vitesh të suksesshme. Ai u transferua gjatë afatit kalimtar të verës në Juventus për 112 milionë euro. Që nga koha kur ishin bashkëlojtarë, Ozili ka arritur ta fitojë Kupën e Botës me Kombëtaren e Gjermanisë, ndërsa Ronaldo ka fituar katër Liga të Kampionëve, si dhe është pesë herë fitues i Topit të Artë.
“Një gjë tjetër për të cilën njerëzit gjithmonë më pyesin është se si ishte të luaja më Cristiano Ronaldon dhe e gjitha që mund të them është se kurrë nuk kam parë një njeri si ai”, ka thënë Ozili.
“Ai punon me të vërtetë shumë dhe ishte gjithmonë i pari në stërvitje, si dhe largohej i fundit. Ai është një profesionist dhe gjithmonë kërkonte të fitonte, edhe në ndeshjet gjatë stërvitjeve. Normalisht, unë e shikoja se çfarë bënte, edhe gjërat më të thjeshta si teknika e gjuajtjes.
Më pëlqente të luaja me të sepse ai më bëri më të mirë në fushë dhe ai është një djalë i mrekullueshëm edhe jashtë fushës. I dhashë atij shumë asiste dhe ai nuk ka nevojë që unë t’ia rikujtoj këtë gjë.
Ishte e lehtë të luaja me të sepse nuk kishim nevojë të krijonim shumë raste. Edhe nëse i bëja vetëm dy pasime, ai i shënonte dy gola dhe për këtë arsye, ai është njëri ndër futbollistët më të mirë në histori të futbollit”.
