PD dhe PDIU kanë zyrtarizuar marrëveshjen e koalicionit, që sipas kreut të PD-së, shtrihet në shumë fusha, duke përqendruar vëmendjen tek lidhjet e krimit dhe politikës.
“PD dhe opozita e bashkuar kanë sot një mision jetik për çdo familje shqiptare; t’i japin fund bashkëqeverisjes me krimin, të largojë një orë e më parë krimin që ka zaptuar qeverinë dhe Parlamentin. Të çlirojë vendin nga sundimi i bandave dhe të ofrojmë vizionin tonë për një Shqipëri me ekonomi të fortë, përmes parimeve dhe normave të ekonomisë së tregut të lirë, dhe luftës pa kompromis kundër korrupsionit qeveritar.
Bashkëpunimi ynë do të shtrihet në të gjitha fushat, në organizimin e zgjedhjeve të lira dhe të ndershme, të çlirimit të drejtësisë nga kapja politike dhe çlirimit të ekonomisë nga oligarkët. PD mbetet thellësisht e angazhuar për të drejtat e shqiptarëve të Çamërisë”, u shpreh Basha.
https://tiranatoday.com/zyrtare-idrizi-braktis-ramen-ne-krah-me-bashen/
Pas rreth një orë bisedimesh në një nga hotelet e kryeqytetit, Basha dhe Idrizi njoftuan se tashmë PDIU i është bashkuar koalicionit të PD. Idrizi shprehu dëshirën për një opozitë të fortë, duke e krahasuar me atë që ai e cilësonte si një mazhorancë arrogante.
Kreu i PDIU, Shpëtim Idrizi, tha se gjatë bashkëpunimit më qeverinë Rama, nuk është bërë asgjë në lidhje me çështjen e Çamërisë. Sipas tij, Rama ka treguar arrogancë për këtë çështje, duke i mohuar të drejtat shqiptarëve të Çamërisë.
“PDIU sot është pjesë e opozitës së bashkuar. Përballë një mazhorance arrogante dhe ajo që është më e rënda, braktisjes së vendit nga shqiptarët, kemi nevojë për një opozitë të fortë që të ketë alternativën e saj për të dalë nga ky tranzicion i tejzgjatur, për t’u dhënë shpresë shqiptarëve”.
