Real Madrid në vitet që u drejtua nga Zinedine Zidane ishte një ndër ekipet më të suksesshme dhe arriti të fitonte Champions Leaguen 3 vite rresht, si nuk kishte ndodhur asnjëherë në historinë e këtij kompeticioni. Të shumtë ishin yjet në skuadrën madrilene dhe për këtë arsye kishte edhe pakënaqësi ndaj trajnerit francez.
I pari që e ka shprehur është Dani Ceballos, i cili nuk ishte ndër të preferuarit e Zidane. Mesfushori madrilen është shprehur se ish-trajneri Zinedine Zidane ndryshonte sistemin e lojës vetëm për të mos e futur atë në ndeshje.
“Gjatë sezonit, ndihesha i zhgënjyer dhe i fyer nga Zidane. Në një pjesë të sezonit Kroos dhe Modrici ishin të lënduar, por ai vendosi ta ndryshonte sistemin e lojës, në mënyrë që të aktivizonte lojtarë të tjerë në ndeshje”, ka thënë Ceballos.
“Kjo gjë të lëndon dhe të pengon. Ne ishim 15 pikë prapa Barcelonës dhe kishim vetëm Ligën e Kampionëve, por unë nuk u përfshiva as në këtë rast”.
Përkundër faktit që sezonin e kaluar nuk iu dhanë shumë mundësi, Ceballos është i sigurt se sezoni i ri do të jetë më i mirë për të, tani që në pozitën e trajneri është Julen Lopetegui e jo Zidane.
“Ai po tenton të na e mësojë stilin e tij, i cili është ndryshe nga ai që kishim sezonin e kaluar. Ai kërkon një skuadër serioze dhe ambicioze në posedim të topit, i pëlqen të luajë me shumë me topin dhe të sulmojë shumë”, është shprehur Ceballos. “Sezoni i kaluar nuk ishte një vit i mirë për mua, por si futbollist, unë jam përmirësuar shumë për shkak të asaj që ndodhi”.
