Fillimisht ishte presidenti i Kukësit, Safet Gjici që ngriti alarmin duke paralajmëruar edhe bojkotin e kampionatit që Policia e Shtetit të kthehet në stadium, ndërsa në mbështetje të tij doli edhe ai i Skënderbeut Ardian Takaj. Por duket se nuk është i këtij mendimi administratori i Flamurtarit, Sinan Idrizi, i cili është një nga drejtuesit që gjithmonë ka kërkuar civilizimin e stadiumeve shqiptare, madje herë pas here duke marrë edhe masa drastike në zbrazjen e tribunave vetëm për arsye të fjalorit vulgar që përdoret rëndom në stadiumet shqiptare.
Në një prononcim për Top Channel, Idrizi është shprehur se nuk është bojkoti zgjidhja e duhur, por duhet të forcojmë ligjin dhe të monitorohen stadiumet me kamera. Nëse duhet të ketë bojkot ai duhet bërë për shitje ndeshjesh, rezultate të paracaktuara apo edhe për arbitrat që vijnë me xhepat plot.
“Policia nëpër stadiume nuk është një akt civil, nuk është një akt qytetar. Për mua nuk është një vendim i parakohshëm, është një vendim që duhet mbështetur. Thjesht duhet të diskutohen detajet e tjera që rrjedhin pas këtij vendimi. Pra, nga njëra anë ne duhet të forcojmë ligjin, e nga ana tjetër duhet që stadiumet tona të bëhen civile. Është shumë e thjeshtë, nuk mbahet çdo gjë në Shqipëri me uniformën e policit, por ka një problem të madh, që klubet shqiptare nuk janë të përgatitura financiarisht të përballojnë këtë situatë”, tha Sinan Idrizi, administrator i Flamurtarit.
“Nëse neve sot nxjerrim si parësore bojkotimin e kampionatit për shkak të elementëve të largimit të policisë nga stadiumet, më duket si gjëja e fundit që të mendojmë për të bërë. Nëse duhet të bojkotojmë duhet ta bëjmë për shit-blerjet e ndeshjeve, për paracaktimin e fituesit, për arbitrat që vijnë me xhepat plot, që bëjnë atë që kanë bërë dhe do bëjnë.
Ejani të dialogojmë, por jo të bojkotojmë. Një qytetërim si anglosaksonët, që janë disa kohë përpara nesh, e shtrënguan stadiumin nëpërmjet ligjit, jo nëpërmjet policisë, nëpërmjet ligjit! Vendosni kamerat nëpër stadiume, identifikoni njerëzit që janë problematik dhe çdo gjë mbyllet thjesht, sepse bojkoti është një fjalë shumë e rëndë”, tha Idrizi.
