Një konflikt familjar është parandaluar në kohë reale nga ana e policisë. Policia ka arrestuar në flagrancë një 58-vjeçar, pasi ushtronte dhunë fizike ndaj bashkëshortes. Po kështu në pranga është vënë edhe bashkëshortja, pasi ka kanosur me armë zjarri bashkëshortin, duke qëlluar në ajër me automatik. Shtetasi Mylazim Abazi, 58-vjeç, kishte ushtruar dhunë fizike ndaj bashkëshortes së tij, Adelina Abazi, 54-vjeçe.
Kjo e fundit nuk ka duruar më këtë situatë, dhe ka marrë një armë zjarri automatik që e mbanin në banesë, pa leje, dhe ka kërcënuar bashkëshortin duke qëlluar në ajër.
“Në Sallën Operative të Komisariatit të Policisë Cërrik, ka ardhur një telefonatë se në fshatin Seferan Belsh, në familjen e shtetasit Mylazim Abazi, ka një konflikt familjar mes bashkëshortëve, ku janë dëgjuar edhe të shtëna me armë.
Menjëherë në drejtim të vendit të ngjarjes kanë shkuar shërbimet e policisë, ku ka rezultuar se:
Shtetasi Mylazim Abazi, 58-vjeç, kishte ushtruar dhunë fizike ndaj bashkëshortes së tij, shtetases Adelina Abazi, 54-vjeçe, e cila më pas kishte marrë një armë zjarri automatik, që e mbanin në banesë pa leje dhe ka kërcënuar bashkëshortin duke qëlluar në ajër në banesë.
Ndërhyrja në kohë e policisë ka parandaluar përshkallëzimin e mëtejshëm të konfliktit, duke bërë arrestimin në flagrancë të dy bashkëshortëve për “Dhunë në familje”, “Armëmbajtje pa leje” dhe “Kanosje”.
Grupi hetimor ka sekuestruar në cilësinë e provës materiale një armë zjarri tip automatik me një krehër me 18 fishekë, si dhe 2 gëzhoja të qitura nga arma automatike.
Materialet u referuan në Prokurorinë pranë Gjykatës së Shkallës së Parë Elbasan, për veprat penale të parashikuara nga nenet 130/a,278/3 dhe 84 të Kodit Penal”.
