Kampionati italian ka zhvilluar vetëm javën e parë dhe kjo është shoqëruar me shumë polemika. Edhe pse në çdo ndeshje është e pranishme teknologjia VAR, gabimet e arbitrave kanë ndikuar në rezultatin e ndeshjes. Kjo ka ardhur për faktin se në sistemin VAR ka pasur disa ndryshime dhe do të ketë më shumë prioritet vendimi i arbitrit, pra me një fjalë VAR po del jashtë loje.
Bëhet fjalë për ndeshjen Sassuolo-Interi, ku vendasit fituan me rezultatin 1-0, por ka disa raste të dyshimta. Në minutën e 33 Mauro Icardi merr një top në zonë dhe Pol Mikel Lirola ndërhyn pas shpinës së tij duke e goditur në kavilje sulmuesin zikaltër. Pavarësisht protestave të shumta, arbitri Mariani lë lojën të vazhdojë dhe nuk kërkon ndërhyrjen e VAR-it.
Ndërsa në minutën e 43’ Kwadwo Asamoah depërton në zonën kundërshtare dhe Francesco Magnanelli e hedh në tokë duke i dhënë një goditje nga pas në kofshën e majtë me gju. Por edhe në këtë rast arbitri nuk e vlerëson si faull, përkundrazi e akordon atë për Sassuolon.
Duke hyrë me specifikisht në temë, ish-arbitri Luca Marelli qartëson më mirë episodin më të diskutuar, ndërhyrjen e gabuar ndaj ganezit:
“Me leximin e protokollit të ri, ky është një episod që nuk mund të ndalet kurrë vetëm tek “on field review” (gjykim duke parë monitorin) sepse nuk bëhet fjalë për një “episod i qartë gabimi”, por vetëm një vlerësim subjektiv i arbitrit mbi të cilën VAR nuk ndërhyn dot. Aksioni është në kontroll të plotë të arbitrit, kontakti është parë nga afër dhe vlerësuar si i rregullt. VAR nuk ka asnjë fuqi me protokollin e ri.”
