Pak më herët u raportua për një shpërthim në një nga çerdhet në Tiranë. Policia po kështu informoi se rreth orës 04:57, në rrugën “Ali Demi”, në një dhomë e cila shërbente si magazinë për një çerdhe, ka patur rënie zjarri. Hijet e dyshimit binin mbi rrjedhjen e gazit nga një bombël gatimi.
Ndonëse banorët e zonës pranë çerdhes në rrugën “Ali Demi”, thonë se kanë dëgjuar një shpërthim dhe kanë parë flakë, drejtoresha e çerdhes thotë krejt të kundërtën.
https://tiranatoday.com/shperthen-gazi-ne-nje-cerdhe-ne-ali-dem/
Sipas saj, çerdhja është e sigurtë dhe bombolat janë të kolauduara. Duke qetësuar banorët, ajo shton se aktiviteti vazhdon normalisht dhe konform parametrave. Ndonëse ka aludime të ndryshme, pritet që vlerësimin ta japin ekspertët. Ajo nuk e ka lënë me kaq, por ka shtuar se kjo ngjarje merr këto përmasa, për shkak të keqbërësve në komunitet.
“Ka një disinformim për një ngjarje që ka ndodhur ngjitur me godinën e çerdhes, dhe jo në godinën e çerdhes. Aktiviteti vazhdon normal dhe konform parametrave. Sa i takon ngjarjes, është një ngjarje në hetim, ka aludime të ndryshme, presim që të shprehen ekspertët, por nuk ndikon në shërbimin që ne ofrojmë.
Sa i përket sigurisë së elementëve të shërbimit, dhe në rastin konkret, bombolave të gazit, ato kanë çertifikatë sigurie, janë të kolauduara dhe nuk ka pasur shpërthim bombole dhe as flakë në godinë.
Megjithatë presim përfundimin e hetimit. Çerdhja është hapur normalisht në orën 06:30, stafi ka ardhur në orën 06:30, ne kemi qenë herët në ngjarje, ka ardhur policia.
Zona nuk ka perimetër sigurie, që do të thotë ngjarja nuk ka ato përmasa që flitet. Është një ngjarje që aludohet nga keqbërës në komunitet”, është shprehur drejtoresha.
