Kryeministri i Kosovës, Ramush Haradinaj, ka thënë në një konferencë për shtyp pas mbledhjes së Qeverisë se lëvizja e kufijve të Kosovës mund të bëhet vetëm me luftë, dhe sipas tij, çështja e vetme që mund të diskutohet me Serbinë është njohja reciproke.
“Kufijtë janë vendosur me luftë, veç lufta i luan. Kush kujton se luhen kufijtë ndryshe është gabim”, ka thënë Haradinaj. “Këta kufij janë vendosur nga Ushtria Çlirimtare e Kosovës, dhe ndërhyrja e NATO-s, këta janë kufij lufte”.
Sipas tij, çfarë ka mbetur të diskutohet me Serbinë është vetëm njohja reciproke, për të cilën ai thotë se e mbështet presidentin Hashim Thaçi. “Kufijtë me i lëvizë i interesojnë vetëm (presidentit rus) Vladimir Putinit. Në kontinentin tonë, nuk ka tjetër kujt që i intereson”.
“Ne nuk i takojmë hartës së tij. Ne i takojmë nja bote tjetër që e udhëheqë Amerika, e ne nuk i përshtatemi lojërave të tij, nuk i luajmë kufijtë”, u shpreh Haradinaj.
Teksa ndodhemi në kulmin e debateve të nxehta në lidhje me çështjen e kufijve të Kosovës, kryeministri kosovar Ramush Haradinaj do të udhëtojë drejt Shqipërisë. Mësohet se Haradinaj do të jetë nesër në Vlorë, ku do të ketë takime me përfaqësues të pushtetit lokal dhe disa aktivitete të përbashkëta.
Por ajo që vihet re është fakti se në axhendë nuk është përcaktuar një takim me kryeministrin Edi Rama. Ndoshta mes dy kryeministrave mund të ketë një takim informal, por kjo gjë nuk bëhet e ditur.
Axhenda
Kryeministri i Republikës së Kosovës, Ramush Haradinaj, nesër, e mërkurë, më 08.08.2018, viziton Bashkinë e Vlorës, Republika e Shqipërisë.
Gjatë kësaj vizite zyrtare kryeministri Haradinaj do të zhvillojë këto aktivitete:
ORA: 11:00 – 11:30- Vizitë në Bashkinë e Vlorës, takim me kryebashkiakun, Dr. Dritan Leli;
ORA: 11:30 – 11:40- Vizitë Monumentit të Pavarësisë;
ORA: 11:50 – 12:00- Vendosja e kurorave me lule pranë varrit të Ismail Qemalit;
ORA: 12:10 – 12:30- Vizitë në Muzeun Historik;
ORA: 12:40 – 12:55- Vizitë në Muzeun e Pavarësisë.
