Gjyqtari i Gjykatës së Lartë, Shkëlzen Selimi, ka dalë sot para Komisionit të Pavarur të Kualifikimit. Ai ka kërkuar pezullimin e seancës dhe hetimin disiplinor ndaj trupës gjykuese të KPK. Pezullimi është kërkuar pasi sipas tij, një televizion ka transmetuar të dhëna sensitive. Këto të dhëna, televizioni i ka siguruar nga KPK. Ai shprehet se janë përdorur të dhëna konfidenciale.
“Përmes komunikimit publik, më është bërë me dije përbërja e trupës gjyqësore. Dhe unë kam shprehur konsideratën për të tre anëtarët e KPK. Por nisur nga faktet që kanë ndodhur rishtaz, dua të nisë hetimi disiplinor ndaj trupës, sepse në TCH dje është transmetuar një kronike ku jep të dhëna sensitive.
Unë kërkoj pezullimin e seancës dëgjimore, sepse do i kërkoj ONM të nisë procedurë disiplinore, sepse janë përdorur të dhëna konfidenciale. Unë dyshoj se këto te dhëna i janë shitur ketij TV, dhe mendoj se ky TV ka shkuar me tej, sa të ndikojë në këtë proces”, ka thënë gjyqtari.
Por pavarësisht pretendimeve të gjyqtarit, KPK ka vendosur të mos pranojë kërkesën e tij dhe ta cilësojë seancën të drejtë. Pas refuzimit të kërkesës nga KPK, gjyqtari Shkëlzen Selimi është larguar nga salla.
“Pasi u njoha edhe me vendimin e ndërmjetëm, çmoj qe vazhdimi i procesit bie ndesh me nenin 6 te Konventës së të Drejtave të Njeriut, për proces te paanshëm. Siç e shpjegova, dyshimi im nuk është te trupa, por te personat që kanë punuar me raportin e DSIK.
Kanë nxjerrë sekret hetimor dhe unë s’jam vënë në dijeni. Ky proces po zhvillohet vetëm te figura. Mua s’më janë bërë me dije hetimi pasuror dhe aftësitë profesionale.
Unë këtu jam për të mbrojtur dinjitetin tim. Pak kush ka mbajt peshë penale si unë me 15 mije çështje te tilla mbi shpatulla. Kam gjykuar çështje penale te jashtëzakonshme. Kam dhënë mbi 15 dënime me burg përjetë. Pasi të largohem, ju lutem bëjani ju me dije publikut, përgjigjet e mia per konstatimet e hetimit administrativ”, tha Selimi përpara se të largohej nga salla.
