Transferimi i Cristiano Ronaldos tek Juventusi ka thelluar diferencat mes bardhezinjve dhe ekipeve të tjera, por mbetet për tu parë se si do të përshtatet ylli portugez në kampionatin italian. Lorenzo Insigne në një intervistë për “La Gazzetta dello Sport” ka folur për Ronaldo, duke thumbuar disi edhe blerjen e madhe të Juventusit.
Sulmuesi shtatshkurtër i Napolit, Lorenzo Insigne është shprehur se pret me shumë kurioizitet se si do të përshtatet ai, por ka thënë edhe se preferon më shumë Messin. “Unë jam kureshtar të shoh se si do të përshtatet ai në ligën tonë. Me siguri nuk do të jetë në gjendje t’i fitojë i vetëm ndeshjet, por unë preferoj Messin. Nuk dua të di nëse ai ka pesë “Topa të Artë”. Ari do të thotë diçka, jo gjithçka.
Mbrojtjet italiane janë të forta, por në një turne të gjatë ne do të shohim. Ndoshta Ronaldo do të jetë i kursyer për në Ligën e Kampionëve, i cili është qëllimi i tij i madh, si edhe i Juventusit. Napoli ka luajtur në 1/8 finale të Champions-it, dy sezone më parë, por Ronaldo nuk mundi të na shënonte asnjë gol”,–pohon Insigne.
Ndërkohë, Insigne ka shijuar ardhjen e trajnerit Carlo Ancelotti: “Ardhja e tij te Napoli është diçka e shkëlqyer. Ai transmeton qetësi në çdo mjedis. Rast i artë për ne, që të përfitojnë prej tij nga çdo moment, në dhomat e zhveshjes, në stërvitje, në ndeshje, apo në tryezë duke folur”.
