Kanë bërë xhiron e rrjetit pamjet ku shfaqet presidenti i Komisionit Evropian, Jean-Claude Juncker duke u kalamendur, me gjasë i dehur. E gjitha kjo para darkës gala të udhëheqësve të NATO-s në Bruksel.
Juncker gati u mbajt për krahësh nga udhëheqësit e Finlandës dhe Ukrainës, pasi nuk mund të hidhte dot hapat për të ecur normal. Por nga ai vetë apo kabineti i tij nuk ka reagim për këtë paraqitje aspak dinjitoze në publik të një zyrtari të lartë të Brukselit.
Por në disa foto të postuara së fundmi duket se edhe kryeministri Edi Rama nuk paska qenë shumë i kthjellët. Ai shikohet nën shoqërinë e Juncker, të cilët duket se kanë ngatërruar derë dhe nuk kanë shkuar tek dhoma e duhur. Kanë qenë dy asistente të cilat i kanë ndihmuar.
Ndërsa përflitet se Juncker ka folur ato çaste, duke u ankuar se vuante nga një problem që nganjëherë ndikonte në lëvizjen e tij.
“Kam vështirësi në këmbë, nuk jam i dehur, kam dhimbje të nervit shiatik, do të doja të isha i dehur”, citohet të ketë thënë Juncker në një rast kur ka shfaqur sjellje të ngjashme, ku fjalia e fundit i është komentuar e thënë nga halli prej dhimbjeve të mëdha.
Ndërsa kryeministri portugez Antonio Costa tha se Juncker u ankua për dhimbjen e shpinës.
