Prej ditësh mediat greke po i bëjnë jehonë marrëveshjes mes Shqipërisë dhe Greqisë. Media greke zougla.gr, shkruan se marrëveshja që do të arrihet mes vendit tonë dhe shtetit fqinj ka në thelb zgjerimin e ujërave territoriale greke me 12 milje dhe zonave të identifikuara si Zonat Ekskluzive Ekonomike.
Zgjerimi prej 12 miljesh e bën që Greqia të vijë gati deri në Karaburun. Gjithashtu, marrëveshja parashikon që Greqia të ketë dominimin e plotë të ishujve në veri të Korfuzit.
Këtu vihet re se në ujërat territoriale kombëtare ekziston një sovranitet i plotë dhe absolut kombëtar. Prandaj, është pronë e shtetit grek.
Në Zonat Ekskluzive Ekonomike nuk ka koncept të sovranitetit absolut kombëtar, por koncept të të drejtave kryesore për shfrytëzimin e burimeve natyrore, siç është në këtë rast nafta.
Kufijtë e fundit të detit të një vendi në përputhje me traktatet ndërkombëtare përcaktohen nga 12 milje ose nga aranzhimet individuale të bëra sipas marrëveshjes së dy palëve të interesuara.
Greqia njeh reduktimin e EEZ-it të saj në BE me 5% krahasuar me marrëveshjen e arritur në vitin 2009. Kjo tërheqje konsiderohet e nevojshme për të qenë në përputhje me letrën dhe frymën e traktatit ndërkombëtar detar, shkruan media greke.
Kufijtë tokësorë: Siç duket, nuk ka as një çështje madhore dhe as të vogël për ndryshim në vijën kufitare tokësore greko-shqiptare, as nuk ka pasur ndonjë diskutim mbi të, as nuk ka ndonjë diskutim në lidhje me të.
Fakti që ka forca politike në Shqipëri, të cilat në mënyra të ndryshme, ligjore apo politike, përpiqen të flasin për kufijtë tokësorë, nuk do të thotë që pala greke është duke diskutuar ose negociuar një gjë të tillë.
Marrëveshja e negociuar me Shqipërinë bazohet vetëm në marrëveshjen e Firences të vitit 1913 dhe në Protokollin e saj të Zbatimit të vitit 1914. Përveç kësaj, nuk ekziston asnjë marrëveshje tjetër.
Por, 24 orët e fundit është vërejtur se mediat greke kanë shkruan me tone të ashpra lidhur me një e ndryshim të planifikuar, negociuar ose nën negocimin e vijës kufitare tokësore me Shqipërinë.
Kjo lidhet me një deklaratë të bërë nga eurokomisioneri Johannes Hahn për një ndryshim të mundshëm të kufijve mes Shqipërisë dhe Greqisë, e cila ka ngjallur reagim të madh tek mediat e vendit fqinj, vijon më tej media greke.
Gjatë një deklarate për ecurinë e bisedimeve mes dy vendeve, Hahn sugjeroi se negociatat Shqipëri-Greqi për të përcaktuar kufijtë detarë në detin Jon mund të çonin në një “ristrukturim të kufijve”, shkruan “Kathimerini”.
Kjo deklaratë e tij është raportuar gjerësisht sot nga të gjithë mediat greke. Por “Kathimerini” pyeti zëdhënësi i Johannes Hahn, për të marrë një përgjigje se çfarë ka dashur realisht të thotë eurokomisioneri me “ristrukturim të kufijve”.
“Në asnjë mënyrë komisioneri Hahn nuk i referohet një ndryshimi kufitar. Duke theksuar nevojën për zgjidhjen e çështjeve të hapura dypalëshe, ai u referohej bisedimeve të vazhdueshme greko-shqiptare mbi zonën ekskluzive ekonomike, e cila mund të arrihet vetëm në bazë të një marrëveshje të pranueshme reciproke mes dy vendeve“, tha zëdhënësi i eurokomisionerit Hahn.
Ndërsa lidhur me këtë situatë një ditë më parë ka reaguar vetë eurokomisioneri Hahn ku është shprehur: “Më vjen keq që deklaratat e mia janë keqkuptuar”.
Ndërsa nga ana tjetër vetë kryeministri grek Alexis Tsipras ka folur nga Brukseli pasi është takuar me homologun e tij shqiptar Edi Rama, lidhur me njërën prej dy çështjeve të pazgjidhura që ka të bëjë me vijën kufitare.
Burimi: zougla.gr
Përshtati: Tirana Today
