Francë-Belgjikë do të jetë përballja e parë gjysmëfinale e këtij Botërori. E veçanta e kësaj sfide nuk është vetëm se luajnë në një gjysmëfinale dhe ekipi që kalon ka shanse të ngrejë kupën e botës, por përballja e francezëve me një legjendë të tyren. Bëhet fjalë për Thierry Henry i cili është asistent i trajnerit Martinez tek Belgjika. Që sulmi i belgëve është kthyer i frikshëm dhe shënon shumë gola, padyshim ka ndikuar dora e tij.
Por me të drejtë francezët kanë ngritur pyetjen, se pse një legjendë e futbollit të tyre nuk gjen vend në stafin e kombëtares. Këtë pyetje ka menduar ti përgjigjet vetë presidenti i federatës franceze Noel Lë Gre.
“Ka qenë pak i shkëputur dhe nuk ka pasur shumë kontakte me federatën. Por jeta është e tillë. Ai ka qëndruar në Angli për shumë kohë dhe nuk kam folur shpesh me të”, tha fillimisht Lë Gre. Më tej, ai flet për rolin që ka pasur në stafin e Belgjikës dhe thotë se u ka mësuar sulmuesve mënyra të tjera për të qenë sa më të frikshëm.
“Ai i ka dhënë Belgjikës dëshirën për të sulmuar. Mendoj se të gjithë e dëgjojnë dhe i respektojnë këshillat e tij. Ai është i zgjuar. Ndoshta ka zgjedhur mënyrën e duhur për të nisur karrierën si trajner duke qenë fillimisht asistent, si Zidane te Reali disa vite më parë. Sigurisht që do të jetë bukur të drejtojë kombëtaren një ditë, por Arsenali nuk është ide e keqe.
Do të jetë një trajner i shkëlqyer dhe me të ardhme. Por e shpjegoj që aktivizimi i tij për shumë vite në Angli e ka shkëputur pak nga Franca”, përfundoi presidenti i federatës.
