Lidhur me krimin e rëndë në familje, ku gruaja i morri jetën burrit në mes të tregut, është zbardhur mesazhi i fundit i shkëmbyer mes çiftit. “Eja te tregu”. Ky ka qenë komunikimi telefonik i fundit mes bashkëshortëve, para se Violeta Donaj të ekzekutonte me pistoletë Kujtim Donajn, në 17 qershor 2018.
Para hetuesve, Violeta Donaj ka pretenduar se dhunohej sistematikisht nga bashkëshorti, Kujtim Donaj, ku edhe nga kqyrja asaj i është konstatuar një dëmtim në krahun e majtë, ndërsa po sipas saj, ai luante edhe bixhoz.
Mësohet se ka qenë gruaja e cila ka mbërritur në treg me automjetin e saj SMART, ngjyrë e kuqe e errët, me targa AA389LR. Pas këtij momenti, ajo ka telefonuar bashkëshortin e saj që të vinte te kioska ku ata tregonin, për të sistemuar mallin.
Kur 42-vjeçari Kujtim Donaj, ka mbërritur pranë vendit të punës, ai është qëlluar me tre plumba pistolete TT, pas shpine nga bashkëshortja e tij. 42-vjeçari ka humbur jetën në vend. Në vendin e ngjarjes janë gjetur tre gëzhoja.
Sipas materialeve të mbledhura nga grupi hetimor në vendin e ngjarjes, Violeta Donaj pas krimit ka hedhur armën e zjarrit, një pistoletë TT mbi mallin e një tregtari tjetër aty pranë dhe është larguar në drejtim të autostradës, e ndjekur nga kunata e saj, shkruan “Shqiptarja”.
Në dosjen e akuzës rezulton se 35-vjeçarja ka ecur në këmbë përgjatë autostradës, e shoqëruar nga kunata e saj, kur edhe janë ndaluar nga patrulla e policisë.
