Nigeria ka mposhtur me rezultatin e pastër 2-0 Islandën dhe ka marrë vendin e dytë në grupin D. Afrikanët u shfaqën me dy fytyra në këtë sfidë, në të parën katastrofë ndërsa në të dytën ishin fantastikë. Nga kjo fitore përfiton dhe Argjentina e cila tashmë e ka në dorë vetë edhe njëherë fatin e kualifikimit, ku i duhet të mposhtë pikërisht Nigerinë më 26 maj.
Pas një pjese të parë të mbyllur në barazim pa gola, takimi është zhbllokuar katër minuta pas fillimit të pjesës së dytë, me Musa që ka shënuar në të 49-ën.
Sulmuesi 25-vjeçar i CSKA-së së Moskës ka qenë protagonist edhe në të 75-ën, kur ka shënuar edhe golin e dytë dhe të fundit të ndeshjes. Islanda ka patur mundësi të ngushtojë diferencat në minutën e 83-të, por Sigurdsson ka gabuar penalltinë që mund të kishte rihapur takimin.
Kështu, islandezët mund ta konsiderojnë veten jashtë Botërorit, duke parë se ndeshjen e tretë dhe të fundit të grupit do ta luajnë kundër Kroacisë, ndërsa Nigeria, siç e thamë, do të zhvillojë një finale të vërtetë kundër Argjentinës së Messi-t, që mbetet akoma në lojë.
