Kombëtarja e Spanjës është tronditur një ditë para se të startojë kampionati botëror dhe dy ditë para se të përballet më Portugalinë e Cristiano Ronaldos. Federata Spanjolle e Futbollit ka vendosur që të shkarkojë Julen Lopetegui pasi trajneri i kombëtares pranoi një ditë më parë për të drejtuar Real Madrid për 3 sezonet e ardhshme.
Me anë të një konference për shtyp të organizuar një ditë më parë ata dhanë lajmin shokues për të gjithë tifozët e Spanjës, madje dhe vetë lojtarët. Fillimisht ky fakt u kundërshtua ashpër nga lojtarët dhe konferenca u anulua, por më pas u diskutua gjatë dhe përfundimi nuk ndryshoi, Lopetegiu duhet të linte ekipin edhe pse vetëm pak ditë më parë kishte rinovuar kontratën me kombëtaren.
Vetë presidenti i Federatës Luis Rubiales e argumentoi vendimin e tij me mënyrën se si Lopetegui arriti marrëveshjen me klubin e Real Madrid. “Negociatat janë zhvilluar pa asnjë dijeni nga Federata, që e mësoi vetëm 5 minuta para konferencës për shtyp, ka një mënyrë të të vepruarit, të cilat duhen plotësuar”, ka deklaruar Rubiales.
Nuk vonoi shumë dhe Federata Spanjolle emëroi trajnerin e ri, i cili do të jetë Fernando Hierron. Ish kapiteni legjendar Madrilen do të marrë detyrën e Julen Lopeteguit pasi ai është zyrtarizuar si trajner i Real Madridit për 3 vitet e ardhshme. Fernando Hierro aktualisht kishte qenë drejtor sportiv i Federatës së futbollit Spanjoll dhe merr detyrën e trajnerit të kombëtares së Spanjës vetëm 1 ditë pas zyrtarizmit të Lopeteguit si trajner i ri i Real Madridit.
Një situatë kaotike që nuk i shërben askujt në kombëtare, por që gjithsesi do të provojnë të ecin përpara dhe të arrijnë objektivat. Por çfarë ndodh nëse Spanja dështon? Në rast dështimi gjithçka do ti faturohet ekipit të Real Madrid i cili nxitoi që të firmoste me trajnerin edhe pse mund të kishte zgjedhur një rrugë tjetër dhe të priste deri në përfundimin e Botërorit. Kjo do të sjellë një acarim të madh edhe të tifozëve madrilenë të cilët nuk do ta duan Lopeteguin në drejtimin e ekipit të tyre të zemrës.
