Shkëndija e Tetovës është duke kaluar momentin më të bukur në historinë e saj, pasi një vit më parë diskutoi përballë Milanit kalimin për në fazën e grupeve të Europa League, ndërsa këtë vit pretendimet janë më të mëdha. Një histori suksesi, nga një ekip në prag falimentimi, në një ekip kampion dhe që tashmë synon europën.
Suksesi i një viti më parë u kurorëzua me një titull kampion këtë sezon në Maqedoni dhe tashmë Shkëndija vazhdon përgatitjet për fazën eliminatore në “Champions League”.
Për këtë arsye, drejtuesit e klubit kanë zgjedhur të bëjnë fazën përgatitore në Slloveni, duke i plotësuar kushtet futbollistëve, që të jenë në kushtet optimale përpara këtyre takimeve. Gjatë ditëve që Shkëndija e Tetovës do të jetë në Slloveni, do të zhvillojë edhe disa teste miqësore, mes të cilave edhe kundër ekipit ukrainas, Vorskla.
Nëpërmjet njoftimit në sitin zyrtar të këtij klubi, bëhet e ditur se Shkëndija është një klub që i përket Shqipërisë, duke u pasqyruar e vërteta në mënyrën e duhur.
