Etrit Berisha ka zhvilluar një sezon mjaft të mirë këtë vit tek Atalanta por duket se nuk ka mjaftuar për të vazhduar karrierën aty. Drejtuesit e friluanëve kanë vendosur që për sezonin e ri të rinovojnë ekipin dhe të marrin sa më shumë emra të rinj në skuadër. Mediat italiane raportojnë se mes të sakrifikuarve është edhe portieri i kombëtares shqiptare, nga largimi i të cilit ekipi pritet të fitojë rreth 8 milionë euro.
Berisha do të largohet nga Atalanta, por jo nga kampionati italian, pasi së fundmi zërat tregojnë se ai është shumë pranë një marrëveshje me Sampdorian. Sipas të përditshmes “Secolo XIX” të qytetit të Genoas, portieri do të veshë fanellën e Sampdorias në sezonin e ardhshëm.
Akordi mes palëve është arritur dhe të gjithë duken të kënaqur me këtë zgjidhje që i garanton Sampdorias një portier të fortë pas largimit të Vivianos, si dhe Berishës mundësinë e aktivizimit si titullar në një klub me emër.
Marrëveshja është arritur dhe vetëm vizitat mjekësore, të cilat do të kryhen sot, ndajnë palët nga firma në kontratë dhe zyrtarizimi i këtij transferimi. Bashkë me Etrit Berishën, në Genoa presin edhe Valon Berishën, i cili do të transferohet në radhët e klubit italian nga Salzburgu.
