Shqipëria dhe Kosova do të masin forcat sonte në mbrëmje në një miqësore e cila do të zhvillohet në Zyrih të Zvicrës, në ndeshjen që cilësohet si vëllazërore. Një ndeshje speciale për të gjithë shqiptarët që do të tejmbushin stadiumin e “Letzingrund”.
Ndryshe nga ndeshja e parë që u zhvillua mes këtyre dy kombëtareve, e cila ishte më shumë një festë se një ndeshje e mirëfilltë, këtë herë ekipet do të përpiqen të japin më të mirën. Është testi i parë i vërtetë për trajnerin Panucci që të krijojë një ide të qartë se ku do ta bazojë formacionin për Ligën e Kombeve dhe kjo e bën serioz impenjimin e lojtarëve.
Kosova nuk ngjason me asnjë prej dy skuadrave që kuqezinjtë kanë në grup në Ligën C, Skocia dhe Izraeli, megjithatë përballë një kundërshtari disi më të dobët dhe që bën pjesë në ligën D, Shqipëria duhet të tregojë forcën e vërtetë dhe të fitojë.
Risi të shumta në formacionin e kuqezinjëve të cilët do të zbresin në fushë me një skuadër shumë herë më të re në moshë. Lenjani nuk ja ka dalë të rikuperohet në kohë nga dëmtimi ndërsa Mavraj edhe për faktin se është me Ramazan do të ulet në stol nga trajneri Panucci. I cili përveç Berishës në portë do të aktivizojë në mbrojtje Hysajn në të djathtë, Xhimshitin dhe Veselin në qendër dhe do të improvizojë Bujar Likën si mbrojtës të majtë në debutimin e këtij të fundit si titullar.
Mesfusha do të përbëhet nga tre lojtarë shumë të rinj në moshë si Ramadani, Qaka dhe Ndoj, të cilët do të duhet të mbulojnë mungesat e emrave me peshë si Xhaka e Abrashi për shkak dëmtimi. Për mesfushorin e Brescias, Ndoj, ky ndaj Kosovës do të jetë një debutim absolut me kombëtaren A. Në sulm përveç Roshit e Cikalleshit do të ketë vend edhe për Sindrit Gurin i cili grumbullohet për herë të parë nga kuqezinjtë pas sezonit spektakolar që zhvilloi me Kukësin.
Përsa i përket Kosovës edhe te Dardanët mungesat do të jenë të shumta ku spikat ajo e Valon Berishës. Trajneri zviceran Bernard Chalandes pritet të luajë me rreshtimin 4-4-1-1, me Avdijajn që do të mbështesë sulmuesin e vetëm Vedat Muriqi, ndërkohë në prapavijë një fanellë titullari do të ketë edhe për mbrojtësin e Skënderbeut Fidan Aliti, por edhe për talentin e Hajdukut të Splitit Ardjan Ismaili.
