Kontrolli i Lartë i Shtetit ka depozituar në Prokurorinë e Kavajës kallëzim ndaj Kryetarit të Bashkisë së Rrogozhinës, Beqir Nuredinin. KLSH ka nisur auditimin në fund të vitit të shkuar për periudhën Janar 2016 deri në fund të 2017-ës.
Nuredini rezulton si person që ka shkaktuar dëm ekonomik në buxhetin e shtetit, në masën e 245 mijë dollarëve për tjetërsim të paligjshëm të pronave shtetërore, me sipërfaqe 27 hektarë. KLSH thotë se në 16 raste, toka shtetërore është dhënë me qira përpara se të ngrihej Komisioni i Qiradhënies së Tokave Bujqësore të Pandara.
Një tjetër shkelje është konstatuar edhe në projektin “Rivitalizimi Urban i Qendrës së Qytetit Rrogozhinë” për volume punimesh të pa kryera, por të paguara. Dëmi ekonomik në këtë rast rezulton 60 mijë dollarë dhe KLSH ka kallëzuar mbikëqyrësin e punimeve.
