Zëvendëskryeministri dhe shefi i diplomacisë serbe, Ivica Daçiç, tha se disa përfaqësues shqiptarë kanë folur se ndarja është zgjidhja më e mirë për Kosovën.
“Unë vazhdoj të them se shqiptarët, kur do të fillonim të bisedonim me ta pa mentorët e tyre, do të pranonin për ndarjen e Kosovës, pasi kjo edhe për ata do të ishte një zgjidhje e mirë“, deklaroi Daçiç.
Kryediplomati serb pohon se i është thënë se ideja për ndarjen e Kosovës është e pranueshme dhe më e mira.
“Duhet të pranoj që presidenti Vuçiç ka bartur mjaft ngarkesë kur bëhet fjalë për kërkimin e zgjidhjeve për Kosovën në shpinën e tij. E dini, nuk është aspak e lehtë të diskutohet dhe të bindet një pjesë e mirë e bashkësisë ndërkombëtare që t’i rishikojë gabimet e tyre. Shumë nga Perëndimi nuk dëshirojnë asgjë të pranojnë përveç përmbushjes së të gjitha kërkesave të shqiptarëve. Kjo nuk mundet. Serbëve kurrgjë, e shqiptarëve të gjitha. E çfarë janë pastaj këto bisedime? Këto janë ultimatume“, u shpreh Daçiç.
I pyetur se me cilin përfaqësues nga Prishtina Serbia do të gjente gjuhën e përbashkët, Daçiç tha se është e vështirë të bisedohet me Pacollin, Haradinajn dhe Thaçin.
“E keni parë që ndaj çdo argumenti tim në OKB, Vlora Çitaku përmendi Millosheviç. Aman, njerëz, lini njeriun, ai ka vdekur, hajde të zgjedhim problemet“, theksoi Daçiç.
