Real Madrid do të kërkojë të shtunën në mbrëmje të hipotekojë trofeun e tretë radhazi të kompeticionit më të rëndësishëm të futbollit, Champions League. Ata tashmë e kanë shkruar historinë pasi janë shpallur 12 herë kampionë, por edhe 3 herë në 4 vitet e fundit, apo edhe rekordi që e gëzojnë vetëm ata dy vite radhazi kampion. Në Kiev, skuadra e trajnerit Zinedine Zidane do të kërkojë të japë më të mirën përballë skuadrës së Jurgen Klopp, e cila pritet të dhurojë spektakël dhe gola.
“Sekreti i këtyre finaleve radhazi në Champions është puna e madhe e bërë përgjatë një viti. Shumë talent dhe shumë stërvitje. Jam i kënaqur që luaj në një tjetër finale. Pasioni për futbollin është baza e këtij suksesi ndër vite dhe kush luan te Reali i ka të gjitha këto cilësi”, tha trajneri francez Zidane.
Skuadra “merengues” kërkon suksesin e tretë radhazi në këtë event, një mision që nuk është shumë i vështirë, duke qenë se madrilenët konsiderohen favoritë. Në dy finalet e fundit, Reali ka mundur Atletico Madrid dhe Juventus, ndërsa tani i takon Liverpool të ndalë skuadrën e Zidane, që kërkon të shkruajë sërish historinë e këtij klubi dhe turneu.
Kush do të luajë? “Cristiano Ronalo është në 150% të formës. Ai e di se çfarë duhet të bëjë në këtë finale. Navas do të luajë, po ashtu edhe Carvajal. Por edhe kush nuk luan është një lojtar i madh. Kur nis ndeshja edhe kush është në stol është i përqendruar tek ajo që ndodh në fushë. Madje edhe ata që janë në tribunë. Si trajner kam dhënë gjithnjë maksimumin tim dhe këto ndeshje janë krejt ndryshe nga ato kur isha lojtar”, thotë Zidane.
Francezi nuk i pëlqen fjala favoritë dhe kërkon të jetë me këmbë në tokë, duke karikuar lojtarët e tij. “As ne dhe as Liverpool nuk është favorit për ta fituar këtë takim, por ju garantoj për një gjë, se do të zhvillojmë një ndeshje të madhe”, thotë Zizu, ndërsa për kolegun e tij Klopp shprehet: “Si lojtar unë kam qenë më i aftë se ai, por si trajner ai ka më shumë përvojë, ka arritur dhe ka bërë gjëra të jashtëzakonshme. Jemi dy trajnerë të ndryshëm, secili ka cilësitë e tij”, tha Zidane.
