Organizata terroriste ISIS nuk ndalet së kërcënuar mbarëvajtjen e Kupës së Botës e cila do të organizohet në Rusi. Pasi publikuan pamje kërcënuese për Messin dhe Neymar, tashmë rreziku është shtrirë në një shkallë më të gjerë ku kërcënohen të gjithë pjesëmarrësit.
“Vritini të gjithë” është mesazhi drithërues i zbuluar nga Site, shoqata që monitoron aktivitetin e terroristëve islamikë në internet. Një mesazh ky që është shoqëruar me imazhin e një thike që pret pjesën e sipërme të Kupës së Botës. Gjatë muajit prill i ashtuquajturi shtet islamik ka kërcënuar edhe presidentin Putin duke e paralajmëruar: “Do ta paguash shtrenjtë vrasjen e myslimanëve”, lexohej në një poster ku shfaqej një xhihadist me një kallashnikov në dorë.
Arsyeja e një urrejtjeje kaq të madhe nga ana e ISIS kundrejt Rusisë bazohet te fakti se presidenti Putin mbështet regjimin sirian të Bashar Al-Assad.
