Në Fier i është vendosur flaka në derën e shtëpisë një biznesmeni në lagjen “15 tetori”. Zjarri është vendosur gjatë orëve të natës, duke rrezikuar jetën e fëmijëve dhe pjesëtarëve të tjerë të familjes.
Zjarrvënësit kanë spërkatur me rreth 5 litra benzinë derën e shtëpisë se biznesmenit Ilirjan Saliajt. Flakët janë përhapur në ambientet e brendshme të shtëpisë. Ka qenë vetë biznesmeni i cili ka ndjerë menjëherë zjarrin dhe ka zbritur fëmijët në errësirë nga ballkoni në ballkon tek fqinjët në katin më poshtë.
Policia deklaron se biznesmeni ka përplasje pronësie për një supermarket. Gjithashtu, biznesmeni ka konflikte edhe për një truall. Po punohet për gjetjen e personave me të cilët Saliaj ka konflikte dhe marrjen e deklarimeve të tyre.
Dyshimet kryesore lidhen me personin me te cilin Saliaj ka administruar një market. Të dy bashkë kanë ushtruar një aktivitet të përbashkët në fushën e industrisë ushqimore por për shkak se kanë falimentuar të dy kanë pretendime ndaj njëri-tjetrin për shuma të mëdha lekësh, rreth 150 milionë lekë të vjetra.
