Italia ka marrë vendimin që trajneri që do0 të marrë drejtimin e kombëtares do të jetë Roberto Mancini. Mediat italiane raportojnë se tashmë mungon vetëm zyrtarizimi, që pritet të vijë pas 13 Majit, periudhë kur Mancini të ketë mbyllur sezonin me Zenit St, Peterburg në Rusi.
Një takim mes ish-trajnerit të Interit dhe Federatës Italiane të Futbollit është zhvilluar të hënën në qytetin e Romës dhe duket se është arritur një akord mes tyre. Debutimi i tij me kombëtaren pritet të vijë më 28 Maj, në miqësoren ndaj Arabisë Saudite, që do të luhet në St. Gallen të Zvicrës, ndërsa ndeshja e parë zyrtare do të jetë ajo e Nations League (Ligës së Kombeve), më 7 Shtator ndaj Polonisë.
Paraprakisht raportohet se akordi mes Mancinit dhe Federatës është arritur për një kontratë 4-vjeçare, deri në Botërorin e Katarit më 2022-shin, ndërsa paga do të jetë 5 milionë euro për atë dhe stafin e tij, plus bonuset mbi arritjen e objektivave. Bashkë me Mancinin, në stolin e Italisë do të ulen edhe bashkëpunëtorët e tij Gregucci e Salsano, si dhe përgatitësi atletik, Carminati.
