Këngëtarja shqiptare Era Istrefi me hitin e saj “Bonbon” arriti të marrë më shumë se 500 milionë klikime dhe ka siguruar koncerte në shumë vende të botës, së fundmi në Dubai.
Pas një koncerti që mbajti atje ajo ka dhënë intervistë për “khaleejtimes” ku ka folur për suksesin, inspirimin dhe albumin e saj. Ajo ka treguar se këtë verë do të lansojë dy këngë të reja.
“Më ka shokuar, sepse nuk kisha qëllim që ‘Bonbon’ të bëhej ndërkombëtarisht e njohur – isha e njohur vetëm te shqiptarët dhe isha duke lëshuar një këngë tjetër, reagimi ishte aq i shpejtë dhe i madh sa që nuk mund ta besoja se çfarë po ndodhte, por ishte kënaqësi, që mund të them definitivisht se ishte momenti më i mirë në jetë”, ka thënë ajo për suksesin me hitin “Bonbon”.
‘Rihanna është frymëzimi im’
Stili i saj i këngës është i ngjashëm me atë të yllit-pop Rihanna, ajo e pranon hapur këtë fakt, duke thënë: “Kur zëri im godet, tingëllon si zëri i Rihannës dhe unë jam e vetëdijshme për këtë. Por në të njëjtën kohë unë e dua atë, sepse ajo është frymëzimi im dhe kam ngjashmëri me të, natyrisht, por gjithmonë përpiqem ta mbaj stilin tim në aspektin e muzikës, tekstit dhe personalitetit – nuk përpiqem ta kopjoj artin e saj, është vetëm zëri im i cili është i ngjashëm me të asaj”.
Era tregon veçantinë dhe origjinalitetin e saj në stilin e saj të muzikës, duke deklaruar se stili i saj nuk i përmbahet një zhanri të vetëm.
“Unë jam si një kameleon, prirem të mërzitem shumë lehtë, kështu që unë dua të ndryshoj pamjen time, zhanrin tim, muzikën time, stilin tim; evoluoj, dhe kombinoj rryma si Hip Hop, RnB, Soul, Pop, Elektronike dhe kohët e fundit Trap, por pop është gjithmonë me mua, kjo është gjëja ime kryesore”.
Në këtë intervistë, Era ka treguar se Rihanna mbetet inspirimi i saj, ndërsa ka treguar se është duke punuar në albumin e parë. Nuk ka dhënë datë të lançimit të albumit.
Në këtë intervistë, Era zbuloi se aktori i preferuar i saj është Al Pacino, ushqimi i preferuar orizi, Rihanna ishte këngëtarja më e dashur, ndërsa për sport s’preferon asnjë skuadër sepse nuk shikon fare. Dubai ishte vendi i saj i preferuar për pushime, ndërsa libri i fundit që ka lexuar është “The Woman’s Handbook”. TIRANA TODAY
