Sekretari i Shtetit belg Theo Francken do të vijë sot në Tiranë, ku do të kryejë deri të premten një mision për të bindur shtetasit shqiptarë të largohen nga vendi i tyre për një të ardhme më të mirë në Belgjikë, raporton dhnet.be.
Shumë prej tyre përpiqen të përdorin procedurën e azilit, e cila ka pak shanse për sukses për ta. Takimet janë planifikuar me autoritetet lokale politike dhe policore.
Bashkimi Evropian dhe disa shtete anëtare në veçanti, duke përfshirë Belgjikën, në vitet e fundit kanë një shkallë të lartë të kërkesave për azil nga shqiptarët, më të lartat për shtetasit e një vendi të kontinentit të vjetër. Në Francë, të mërguarit shqiptarë ishin edhe më të shumtët në vitin 2017 midis kandidatëve për azil, përpara shtetasve të vendeve në krizë si afganët, sudanët apo sirianët.
Shqipëria quhet “vend i sigurt” nga Evropa dhe Belgjika. Ky kualifikim nuk i përjashton autoritetet nga shqyrtimi i kërkesave individuale të azilkërkuesve në përputhje me Konventën e Gjenevës e cila mbron viktimat e mundshme të persekutimit për shkak të racës, fesë, kombësisë, anëtarësisë në një grup të caktuar shoqëror ose mendimet e tyre politike.
Për shtetasit e vendeve të sigurta, ekzaminimi i dosjeve bëhet sipas një procedure të përshpejtuar. Shkalla e njohjes së azilkërkuesve shqiptarë është veçanërisht e ulët. Është 5% në Belgjikë. TIRANA TODAY
