Ofendon rëndë arbitrin, Keidi Bare rrezikon të ardhmen në Madrid

Ishte momenti i tij, për të shpërthyer në ekipin e parë të Diego Simeones, por si duket e dogji vetë mundësinë e madhe. Bëhet fjalë për kapitenin e kombëtares kuqezi U-21, Keidi Bare. Ai mbanë veshur fanellën e Atletico Madridrit, por pas asaj që ka bërë në ndeshjen e fundit gjatë ndeshjes me ekipin e dytë mund ti heqë mundësinë e artë. Simeone dukej se do ti jepte shansin që të luante në ndeshje e fundit të kampionatit, por ai karton i kuq në ndeshjen e fundit i komplikon gjërat.

Bare është ndëshkuar me karton të kuq në duelin e Atletiko Madrid B kundër Deportivo Febril që në minutën ë 15 të ndeshjes. Shkak për këtë ishte një fyerje ndaj gjyqtarit të ndeshjes, Hose Hoakin Galego Gambin. Ky i fundit ka shpjeguar në relacion se pse kishte ndëshkuar futbollistin shqiptar, duke argumentuar se lojtari e kishte sharë rëndë me një frazë në spanjisht që pak a shumë përkthehet në “ik q**”. “M’u drejtua me frazën në fjalë”, shkruhej në relacionin e  bërë publik nga mediat spanjolle, për episodin kur Bare kishte marrë të verdhë dhe kishte kontestuar vendimin e gjyqtarit.

Pasi gjyqtari i kishte nxjerrë të kuqin, Bare nuk ishte kursyer përsëri, sipas raportit të bërë publik. “Pasi u përjashtua, m’u drejtua me frazat ‘Je budalla, je budalla. Bir k****’ e fyerje të tjera shpjegoi gjyqtari, i cili tregoi se mesfushori shqiptar kishte përkeqësuar gjithçka në pushimin e ndeshjes.

Ai kishte pritur gjyqtarin në tunelin e dhomave të zhveshjes, duke e sulmuar përsëri. “Në fundin e pjesës së parë, kur ne bëheshim gati të hynim në dhomat tona të zhveshjeve, futbollisti në fjalë gjendej para derës, duke na u kthyer përsëri me të njëjtat fraza të përmendura më parë, në mënyrë të vazhdueshme”, shkruhej në raportin zyrtar të ndeshjes.

Mediat spanjolle parashikojnë që këto situata të përshkruara për Baren, do t’i kushtojnë shtrenjtë lojtarit, nga 4 deri në 12 javë pezullim. Por më i rëndë është fakti se në radhët e Atletiko Madrid, rrallëherë pranohen lojtarë të cilët thyejnë disiplinën apo njollosin imazhin e klubit, ndaj ai mund të ketë dëmtuar rëndë shanset e tij për t’iu bashkuar ekipit të parë në sezonin e ardhshëm.