Një kampion i ri bote është kurorëzuar një natë më parë në UFC, në peshën e lehtë ta arteve marciale, ai është rusi Khabib Nurmagomedov. Ky i fundit ka rrëmbyer titullin që deri pak ditë më parë e mbanë Conor McGregori, me të cilin u përfshi në një incident, ku irlandezi sulmoi autobusin e luftëtarëve të UFC-së me mjete të forta pas konferencës.
Dueli i Khabib me Al Iaquinta nuk ishte në nivelin e pritshmërisë së publikut, pasi shkoi me 5 raunde dhe fituesi u përzgjodh me vendim unanim të gjyqtarëve, 50-44, 50-43 dhe 50-43, të tri në favor të rusit.
Rusit iu ndërruan tre kundërshtarë brenda javës, por kjo nuk pati ndikim pasi ishte favorit në këtë përballje dhe ia arriti mjaft mirë ta fitojë edhe pse pa shumë shkëlqim. Nurmagomedov korri suksesin e 26-të në karrierën e tij në UFC, ku nuk ka asnjë humbje. Një fitore pa shumë shkëlqim për të.
Nurmagomedov ishte superior në kafaz në të 5 raundet, e dominoi sfidën me grushtet e tij, u përpoq ta mbyllte atë më herët me disa kapje në tapet, por pa sukses. Por rusi asnjëherë nuk e vuri në diskutim fitoren edhe pse paraqitja e tij ishte jo në lartësinë e duhur, duke u shpallur kështu kampion bote në moshën 29-vjeçare. Titull që erdhi në fund të një jave të çmendur në UFC, me ngjarje nga më të pabesueshmet.
Tashmë pritet që të ketë një reagim nga Conor McGregor i cili pritet të futet në kafaz për të rimarrë titullin kampion bote dhe përballja me Khabib do të jetë një spektakël i garantuar. Kjo sfidë është ndezur shumë pas përplasjes së javës së fundit dhe interesi do të jetë i jashtëzakonshëm, tani topi kalon në dorën e Conor i cili duhet të vendosë të rikthehet në UFC për të luftuar.
